جەتىسۋ وبلىسىنىڭ اكىمى بەيبىت يساباەۆ بۇگىن تالدىقورعان قالاسىنداعى جولداردى جوندەۋ جانە اباتتاندىرۋ جۇمىستارىنىڭ بارىسىن تەكسەردى. ءوڭىر باسشىسىنىڭ ايتۋىنشا، بيىل وبلىس ورتالىعىنداعى نەگىزگى 11 كوشەگە جوندەۋ جۇمىستارى جۇرگىزىلەدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
قالانى ارالاۋ بارىسىندا وبلىس اكىمى شەۆچەنكو، ەسكەلدى بي جانە دايروۆ كوشەلەرىندەگى جوندەۋ جۇمىستارىنىڭ بارىسىمەن تانىستى. جوندەلىپ جاتقان ۋچاسكەلەردىڭ جالپى ۇزىندىعى 6,5 شاقىرىم. شەۆچەنكو كوشەسىندەگى جوندەۋ جۇمىستارى كەلەسى اپتادا اياقتالادى دەپ جوسپارلانسا، بارلىق جوبانى تولىق ىسكە اسىرۋ ماۋسىم ايىنىڭ سوڭىنا دەيىن بىتەدى دەپ كۇتىلىپ وتىر.
– بيىل تالدىقورعان قالاسىنداعى بارلىق نەگىزگى كوشەلەردىڭ جوندەۋ جۇمىستارىن اياقتايمىز. نازارباەۆ داڭعىلىنداعى جۇمىستاردىڭ باسىم بولىگى اتقارىلدى. قابانباي باتىر كوشەسى وتكەن جىلى تولىق رەتكە كەلتىرىلدى. جانسۇگىروۆ كوشەسىندەگى جوندەۋ بيىل اياقتالادى. سونىمەن قاتار ەسكەلدى بي كوشەسىنەن گاگارين كوشەسىنە دەيىنگى كولدەنەڭ كوشەلەر دە وسى جىلى جوندەلەدى. سونداي-اق اۋەجايعا دەيىنگى اينالما جولدىڭ قۇرىلىسىن بىتىرەمىز. كەلەسى جىلى قالانىڭ كىرەبەرىس اركاسىنان ورتالىق باسسەين ماڭىنداعى اينالما جولعا دەيىنگى ۋچاسكە جوندەلەدى. بۇدان بولەك، قالعان شاعىن جول بولىكتەرى دە كەزەڭ-كەزەڭىمەن قالپىنا كەلتىرىلەدى. وسىلايشا، كەلەسى جىلى وبلىس ورتالىعىنداعى جولداردى جوندەۋ ماسەلەسى تولىق شەشىلەدى، – دەپ اتاپ ءوتتى بەيبىت يساباەۆ.
ابىلاي حان كوشەسىندەگى ورتاشا جوندەۋ جۇمىستارىنا دا ەرەكشە نازار اۋدارىلدى. قازىر نىساندا 20 ارنايى تەحنيكا مەن 30 جۇمىسشى ەڭبەك ەتۋدە.
– جوندەۋ جۇمىستارى ءبىر جارىم اي بۇرىن، ءساۋىر ايىندا باستالدى. جوندەلىپ جاتقان جول ۋچاسكەسىنىڭ ۇزىندىعى – 1 شاقىرىم 720 مەتر. ول تاۋەلسىزدىك داڭعىلىنان تىنىشپاەۆ كوشەسىنە دەيىنگى ارالىقتى قامتيدى. جوبا اياسىندا جول جيەگىنە جيەكتاستار قويىلىپ، جاياۋ جۇرگىنشىلەر جولدارى اباتتاندىرىلدى. قازىرگى كەزدە نەگىزگى جۇمىستاردىڭ باسىم بولىگى اياقتالدى. ەندى وسى اپتانىڭ سوڭىنا دەيىن اسفالت توسەپ بولامىز دەپ جوسپارلاپ وتىرمىز، – دەدى وبلىس اكىمىنە جۇمىس بارىسىن بايانداعان مەردىگەر كومپانيا ديرەكتورىنىڭ ورىنباسارى ادىلەت ادىلعازين.
جوندەلىپ جاتقان كوشەلەردىڭ تۇرعىندارى اتقارىلعان جۇمىستاردىڭ ساپاسىنا وڭ باعا بەردى. ولاردىڭ قاتارىندا جەرگىلىكتى كاسىپكەرلەر دە بار. تۇرعىنداردىڭ ايتۋىنشا، جول ينفراقۇرىلىمىن جاڭارتۋ اۆتوكولىك جۇرگىزۋشىلەرى مەن جاياۋ جۇرگىنشىلەرگە عانا ەمەس، شاعىن بيزنەستىڭ دامۋىنا دا قولايلى جاعداي جاساپ وتىر.
– ءبىزدىڭ دۇكەنىمىز شەۆچەنكو كوشەسىندە ورنالاسقان. جولدىڭ جوندەلىپ، كەڭەيتىلۋىنىڭ ارقاسىندا كاسىپكەرلەرگە دە، تۇتىنۋشىلارعا دا قولايلى جاعداي جاسالدى. دايروۆ كوشەسىندە ورنالاسقان ارىپتەستەرىم دە ءدان ريزا. ويتكەنى بۇل كوشەدە بۇرىن-سوڭدى اۋقىمدى جوندەۋ جۇمىستارى جۇرگىزىلمەگەن ەدى. جالپى، قالا ورتالىعىندا، بازار ماڭىندا كولىك قوزعالىسى، كىرىپ-شىعۋ جانە اۆتوتۇراق ماسەلەلەرى قيىن بولاتىن. قازىر بۇل تۇيتكىلدەر شەشىمىن تاۋىپ كەلەدى. سوعان ريزامىز، – دەپ پىكىرىن ءبىلدىردى جەرگىلىكتى تۇرعىن.
بەيبىت يساباەۆ جول جوندەۋ جۇمىستارىنىڭ ساپاسى مەن قارقىنى، قۇرىلىس تەحنولوگيالارىنىڭ ساقتالۋى مەن پايدالانىلاتىن ماتەريالداردىڭ بەرىكتىگى تۇراقتى باقىلاۋدا بولۋى ءتيىس ەكەنىن ەرەكشە اتاپ ءوتتى.
جالپى، بيىل تالدىقورعان قالاسىندا جالپى ۇزىندىعى شامامەن 30 شاقىرىمدى قۇرايتىن 21 كوشە مەن ساياجاي القاپتارىنىڭ جولدارىنا ورتاشا جوندەۋ جۇمىستارى جۇرگىزىلۋدە.
