ابايدا وبلىستىق ماڭىزى بار اۆتوجولدى سۋ باستى، دەپ حابارلايدى "ادىرنا" ءتىلشىسى.
تجم ماقانشى اۋىلىنان 11 شاقىرىم جەردە «ماقانشى-جالاڭاشكول» اۆتوجولىندا قاردىڭ قارقىندى ەرىپ جاتقانىن مالىمدەدى. سول سەبەپتى جولدى سۋ باسقان.
«ەلدىمەكەندەردە جول توسەمىنىڭ شايىلىپ كەتۋ قاۋپى جانە سۋ باسۋ قاۋپى جوق. تۇرعىن ۇيلەرگە قاۋىپ ءتونىپ تۇرعان جوق. قازىرگى ۋاقىتتا جەرگىلىكتى جەردە جاو 50-گە جۋىق ادام جانە 4 تەحنيكا جۇمىس اتقارىپ جاتىر. قوسىمشا اياگوز قالاسىنىڭ جەدەل-قۇتقارۋ جاساعىنىڭ جانە ماقانشى اۋىلىنىڭ № 18 ءورت ءسوندىرۋ ءبولىمىنىڭ كۇشتەرى، جەكە قۇرامنىڭ 12 ادامى، 7 بىرلىك تەحنيكا ء(جۇزۋ قۇرالى، موتوپومپا) جىبەرىلدى. ماقانشى اۋدانىنىڭ اكىمى داۋرەن قويگەلدين مەن ءۇرجار اۋدانىنىڭ تجب باستىعى بەكتىعازى سايانوۆ وقيعا ورنىندا. جاعداي باقىلاۋدا»، - دەلىنگەن تجم حابارلاماسىندا.
اۋماقتا اۆتوكولىك قوزعالىسى توقتاتىلعان. جۇرگىزۋشىلەر اينالما جولدار ارقىلى ءجۇرۋى كەرەك. پوليتسيا دەپارتامەنتىنىڭ كۇشىمەن اينالما جول بويىنشا قوزعالىس جۇزەگە اسىرىلادى، تىيىم سالۋ بەلگىلەرى قويىلدى.
