تالدىقورعاندا سايلاۋعا تۇيە ءمىنىپ كەلگەن جەرگىلىكتى تۇرعىن جۇرتتىڭ نازارىن اۋدارتتى. بۇل تۋرالى جەتىسۋ وبلىسى اكىمىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
اقپارات بويىنشپ، تالدىقورعاندىق ۇلان بايزاقوۆ تاڭەرتەڭ كەلىپ، ءوزىنىڭ كانديداتى ءۇشىن ءبىرىنشى بولىپ داۋىس بەردى.
ءار دەمالىس نەمەسە مەرەكە سايىن بالالار مەن ەرەسەكتەردى تۇيەسىمەن سەرۋەندەتەتىن جىگىت سايلاۋعا تۇيە ءمىنىپ، بايان ويناتىپ، دۋمانداتىپ كەلدى.
"اپتانىڭ دەمالىس كۇندەرى تۇيەمدى ورتالىق ساياباقتارعا الىپ شىعامىن. ۇستىنە مىنگەنىنە قۋانعان بالالاردى كورۋدىڭ ءوزى عانيبەت. وسىنداي قىزمەت كورسەتۋدەن تاپقان قاراجاتتى تۇيەنىڭ جەم-شوبىنە، ءدارى-دارمەگىنە جۇمسايمىن. بۇگىنگى سايلاۋعا ەرتەلەتىپ كەلىپ، داۋىس بەردىم. سەبەبى كۇنى بويى تۇيە باعىمىنا قاتىستى اتقاراتىن شارۋام كوپ", - دەيدى ۇلان بايزاقوۆ.
ايتا كەتەيىك، قازاقستاندا ءماجىلىس جانە ءماسليحات دەپۋتاتتارىنىڭ كەزەكتەن تىس سايلاۋى ءوتىپ جاتىر. بيىل پارلامەنتتىك سايلاۋ العاش رەت ارالاس جۇيە بويىنشا وتەدى. ءماجىلىستىڭ 69 دەپۋتاتى پارتيالىق ءتىزىم بويىنشا، 29-ى ءبىر مانداتتى وكرۋگتەر بويىنشا سايلانادى.
