Jetısu oblysynyŋ äkımı Beibıt İsabaev bügın Taldyqorǧan qalasyndaǧy joldardy jöndeu jäne abattandyru jūmystarynyŋ barysyn tekserdı. Öŋır basşysynyŋ aituynşa, biyl oblys ortalyǧyndaǧy negızgı 11 köşege jöndeu jūmystary jürgızıledı, - dep habarlaidy Jetısu oblysy äkımınıŋ baspasöz qyzmetı.
Qalany aralau barysynda oblys äkımı Şevchenko, Eskeldı bi jäne Dairov köşelerındegı jöndeu jūmystarynyŋ barysymen tanysty. Jöndelıp jatqan uchaskelerdıŋ jalpy ūzyndyǧy 6,5 şaqyrym. Şevchenko köşesındegı jöndeu jūmystary kelesı aptada aiaqtalady dep josparlansa, barlyq jobany tolyq ıske asyru mausym aiynyŋ soŋyna deiın bıtedı dep kütılıp otyr.
– Biyl Taldyqorǧan qalasyndaǧy barlyq negızgı köşelerdıŋ jöndeu jūmystaryn aiaqtaimyz. Nazarbaev daŋǧylyndaǧy jūmystardyŋ basym bölıgı atqaryldy. Qabanbai batyr köşesı ötken jyly tolyq retke keltırıldı. Jansügırov köşesındegı jöndeu biyl aiaqtalady. Sonymen qatar Eskeldı bi köşesınen Gagarin köşesıne deiıngı köldeneŋ köşeler de osy jyly jöndeledı. Sondai-aq äuejaiǧa deiıngı ainalma joldyŋ qūrylysyn bıtıremız. Kelesı jyly qalanyŋ kıreberıs arkasynan ortalyq bassein maŋyndaǧy ainalma jolǧa deiıngı uchaske jöndeledı. Būdan bölek, qalǧan şaǧyn jol bölıkterı de kezeŋ-kezeŋımen qalpyna keltırıledı. Osylaişa, kelesı jyly oblys ortalyǧyndaǧy joldardy jöndeu mäselesı tolyq şeşıledı, – dep atap öttı Beibıt İsabaev.
Abylai han köşesındegı ortaşa jöndeu jūmystaryna da erekşe nazar audaryldy. Qazır nysanda 20 arnaiy tehnika men 30 jūmysşy eŋbek etude.
– Jöndeu jūmystary bır jarym ai būryn, säuır aiynda bastaldy. Jöndelıp jatqan jol uchaskesınıŋ ūzyndyǧy – 1 şaqyrym 720 metr. Ol Täuelsızdık daŋǧylynan Tynyşpaev köşesıne deiıngı aralyqty qamtidy. Joba aiasynda jol jiegıne jiektastar qoiylyp, jaiau jürgınşıler joldary abattandyryldy. Qazırgı kezde negızgı jūmystardyŋ basym bölıgı aiaqtaldy. Endı osy aptanyŋ soŋyna deiın asfalt tösep bolamyz dep josparlap otyrmyz, – dedı oblys äkımıne jūmys barysyn baiandaǧan merdıger kompaniia direktorynyŋ orynbasary Ädılet Ädılǧazin.
Jöndelıp jatqan köşelerdıŋ tūrǧyndary atqarylǧan jūmystardyŋ sapasyna oŋ baǧa berdı. Olardyŋ qatarynda jergılıktı käsıpkerler de bar. Tūrǧyndardyŋ aituynşa, jol infraqūrylymyn jaŋartu avtokölık jürgızuşılerı men jaiau jürgınşılerge ǧana emes, şaǧyn biznestıŋ damuyna da qolaily jaǧdai jasap otyr.
– Bızdıŋ dükenımız Şevchenko köşesınde ornalasqan. Joldyŋ jöndelıp, keŋeitıluınıŋ arqasynda käsıpkerlerge de, tūtynuşylarǧa da qolaily jaǧdai jasaldy. Dairov köşesınde ornalasqan ärıptesterım de dän riza. Öitkenı būl köşede būryn-soŋdy auqymdy jöndeu jūmystary jürgızılmegen edı. Jalpy, qala ortalyǧynda, bazar maŋynda kölık qozǧalysy, kırıp-şyǧu jäne avtotūraq mäselelerı qiyn bolatyn. Qazır būl tüitkılder şeşımın tauyp keledı. Soǧan rizamyz, – dep pıkırın bıldırdı jergılıktı tūrǧyn.
Beibıt İsabaev jol jöndeu jūmystarynyŋ sapasy men qarqyny, qūrylys tehnologiialarynyŋ saqtaluy men paidalanylatyn materialdardyŋ berıktıgı tūraqty baqylauda boluy tiıs ekenın erekşe atap öttı.
Jalpy, biyl Taldyqorǧan qalasynda jalpy ūzyndyǧy şamamen 30 şaqyrymdy qūraityn 21 köşe men saiajai alqaptarynyŋ joldaryna ortaşa jöndeu jūmystary jürgızılude.
