جوعارى ەۋرازيالىق ەكونوميكالىق كەڭەستىڭ وتىرىسى ەۋرازيالىق ينتەگراتسيانىڭ جاڭا كەزەڭگە وتكەنىن تاعى ءبىر مارتە ايقىندادى. قازىرگى تاڭدا باستى نازار تەك ەكونوميكالىق ساياساتتى ۇيلەستىرۋگە عانا ەمەس، سونىمەن قاتار جاھاندىق تۇراقسىزدىق جاعدايىندا بىرلەسكەن تۇراقتى دامۋ مودەلىن قالىپتاستىرۋعا باعىتتالىپ وتىر.
ەاەو-نىڭ قازىرگى كۇن ءتارتىبى جاھاندىق جەتكىزۋ تىزبەكتەرىنىڭ ترانسفورماتسياسى، گەوەكونوميكالىق باسەكەنىڭ كۇشەيۋى جانە ەكونوميكالاردىڭ جەدەل تسيفرلانۋى سياقتى فاكتورلاردىڭ ىقپالىمەن قالىپتاسۋدا. وسىنداي جاعدايدا ينتەگراتسيالىق بىرلەستىك جاي عانا ديالوگ الاڭى ەمەس، جاڭا سىن-قاتەرلەرگە بەيىمدەلۋدىڭ ءتيىمدى قۇرالىنا اينالىپ وتىر.
قازاقستان ءۇشىن ەاەو-عا قاتىسۋ ستراتەگيالىق ماڭىزعا يە. بۇل وداق كەڭەيتىلگەن نارىققا قول جەتكىزۋگە مۇمكىندىك بەرەدى، سىرتقى ەكونوميكالىق بايلانىستاردىڭ تۇراقتىلىعىن قامتاماسىز ەتەدى جانە كەلىسىلگەن ساياسات شەڭبەرىندە ۇلتتىق مۇددەلەردى ىلگەرىلەتۋگە جاعداي جاسايدى. اسىرەسە ونەركاسىپتىك كووپەراتسيانى دامىتۋ، كولىك-لوگيستيكالىق دالىزدەردى جەتىلدىرۋ جانە ەكونوميكالىق ءوزارا ءىس-قيمىلدىڭ جاڭا ارحيتەكتۋراسىن قالىپتاستىراتىن تسيفرلىق شەشىمدەردى ەنگىزۋ ەرەكشە ماڭىزعا يە.
سونىمەن قاتار ينتەگراتسيالىق تەتىكتەردىڭ تيىمدىلىگىن ارتتىرۋ نەگىزگى مىندەتتەردىڭ ءبىرى بولىپ قالا بەرەدى. وڭىرلىك بىرلەستىكتەر اراسىنداعى باسەكەلەستىك كۇشەيگەن جاعدايدا تەك كەدەرگىلەردى فورمالدى تۇردە جويۋ جەتكىلىكسىز. ەكونوميكالىق پروتسەستەردىڭ ناقتى ۇيلەسىمدىلىگى، رەتتەۋدىڭ اشىقتىعى جانە ەرەجەلەردىڭ بولجامدىلىعى شەشۋشى ءرول اتقارادى.
كەڭەس وتىرىسى ەاەو ەلدەرىنىڭ نەعۇرلىم تەرەڭ ءارى ناتيجەگە باعىتتالعان ىنتىماقتاستىققا دايىن ەكەنىن كورسەتتى. بۇل قازاقستان ءۇشىن ەۋرازيالىق ەكونوميكالىق كەڭىستىكتەگى ءوز ءرولىن كۇشەيتۋگە جانە وڭىرلىك تۇراقتىلىقتىڭ ماڭىزدى درايۆەرىنە اينالۋعا مۇمكىندىك بەرەدى.
جاننا ەرمەكوۆا
ەكونوميكا جانە بيزنەس جوعارى مەكتەبىنىڭ دەكانى م.ا.
ءال-فارابي اتىنداعى قازۇۋ
