«قازمۇنايگاز» ۇلتتىق كومپانياسى مەن نەمىس Rosneft Deutschland GmbH كومپانياسى گەرمانياعا مۇناي جەتكىزۋ جونىندەگى كەلىسىمشارتتىڭ مەرزىمىن 2026 جىلدىڭ سوڭىنا دەيىن ۇزارتتى، دەپ حابارلايدى "ادىرنا" ۇلتتىق پورتالى.
كەلىسىمگە سايكەس، قازاقستاندىق مۇنايدىڭ اي سايىنعى ەكسپورتى 100 مىڭ توننادان 130 مىڭ تونناعا دەيىن وسەدى.
مۇناي جەتكىزىلىمى رەسەي اۋماعى ارقىلى وتەتىن «دوستىق» ماگيسترالدىق قۇبىرى ارقىلى جۇزەگە اسىرىلماق. بۇل باعىت بويىنشا قازاقستاننان گەرمانيانىڭ شۆەدت قالاسىنداعى مۇناي وڭدەۋ زاۋىتىنا مۇناي جەتكىزۋ 2023 جىلى باستالعان ەدى.
«قازمۇنايگازدىڭ» حابارلاۋىنشا، ەكسپورتقا باعىتتالاتىن مۇنايدىڭ نەگىزگى بولىگى «كاراچاگاناك پەتروليۋم وپەرەيتينگ ب.ۆ.» كومپانياسىنىڭ كەن ورىندارىنان وندىرىلەدى. سونىمەن قاتار، 2024 جىلدان باستاپ گەرمانياعا جەتكىزىلەتىن مۇنايدىڭ ءبىر بولىگى كاسپي تەڭىزىندەگى قاشاعان كەن ورنىنان، ال 2025 جىلدان باستاپ تەڭىز كەن ورنىنان الىنادى.
كەلىسىمنىڭ ۇزارتىلۋى مەن جەتكىزۋ كولەمىنىڭ ارتۋى تۋرالى شەشىم «قازمۇنايگاز» باسقارما توراعاسى اسحات حاسەنوۆ پەن Rosneft Deutschland باس ديرەكتورى يوحاننەس برەمەر اراسىنداعى كەلىسسوزدەر ناتيجەسىندە قابىلدانعان. تاراپتار ەكى ەل اراسىنداعى ەنەرگەتيكالىق ىنتىماقتاستىقتى ءارى قاراي نىعايتۋعا مۇددەلى ەكەندەرىن اتاپ ءوتتى.
سونداي-اق، 2025 جىلدىڭ توعىز ايىندا قازاقستاننان شۆەدتتەگى زاۋىتقا جەتكىزىلگەن مۇناي كولەمى شامامەن 1,5 ملن تونناعا جەتكەن.
