شىمكەنتتە كوشەدە ايەلدى پىشاقتاپ ولتىرگەن ەر ادام قىلمىستىق جاۋاپكەرشىلىكتەن بوساتىلدى، دەپ حابارلايدى "ادىرنا" ۇلتتىق پورتالى Otyrar-عا سىلتەپ.
قايعىلى وقيعا قاڭتار ايىنىڭ سوڭىندا بولعان. پوليتسيا مالىمەتىنشە، ەر ادام ەمحانادان قايتىپ كەلە جاتقان ايەلگە كوشەدە پىشاق جاراقاتىن سالعان. زارداپ شەگۋشى وقيعا ورنىندا كوز جۇمعان.
كۇدىكتىنى ۇستاۋ كەزىندە ول پوليتسيا قىزمەتكەرلەرىنە قارسىلىق كورسەتىپ، قولىنداعى پىشاقپەن ءتارتىپ ساقشىلارىنا شابۋىلداعان. وسىعان بايلانىستى پوليتسيا قىزمەتتىك قارۋ قولدانۋعا ءماجبۇر بولعان.
سوت بارىسىندا ايىپتالۋشىنىڭ 2022 جىلدان بەرى پسيحيكالىق اۋرۋ بويىنشا ەسەپتە تۇرعانى انىقتالدى. ول بىرنەشە رەت ەم قابىلداپ، دارىگەرلەردىڭ باقىلاۋىندا بولعان. سونىمەن قاتار ەر ادامنىڭ ەكىنشى توپتاعى مۇگەدەكتىگى بار ەكەنى بەلگىلى بولدى.
شىمكەنت قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ەر ادامنىڭ پسيحيكالىق دەرتكە بايلانىستى ءوز ارەكەتىنە ەسەپ بەرە الماعانىن ەسكەرىپ، ونى قىلمىستىق جاۋاپكەرشىلىكتەن بوساتتى. سوت شەشىمىمەن قىلمىستىق ءىس توقتاتىلىپ، كۇدىكتى كۇشەيتىلگەن باقىلاۋداعى پسيحياتريالىق مەكەمەدە ءماجبۇرلى ەم قابىلداۋعا جىبەرىلدى.
