استاناداعى فتيزيوپۋلمونولوگيا ورتالىعىنا جەدەل جاردەممەن جەتكىزىلگەن 43 جاستاعى رۋسلان رىشقوۆ قابىلداۋ بولىمىندە دارىگەرلەردىڭ قاراۋىنسىز جاتىپ، كوز جۇمعان. بۇل تۋرالى 31 ارنا جاريالادى، دەپ حابارلايدى “ادىرنا” ۇلتتىق پورتالى.
مارقۇمنىڭ ايەلىنىڭ ايتۋىنشا، دارىگەرلەر دەنساۋلىعىندا كىنارات جوق دەگەن سوڭ ول 6 ساعات بويى قاراۋسىز جاتقان.
وقيعا 20 اقپاندا بولعان. 8 جىلدان بەرى دەمىكپەمەن اۋىراتىن ناۋقاستىڭ بۇل جولعى جاعدايى اسا اۋىر بولعانمەن قابىلداۋ بولىمىندەگى ماماندار ونى اۋرۋحاناعا جاتقىزۋدان باس تارتىپتى. سول ءۇشىن مارقۇمنىڭ ايەلى ايزادا قۇلمۇراتوۆا ىسىنە سالعىرت قاراعان دارىگەرلەردى سوتقا بەرمەك.
“ەگەر ساعان مەنىڭ تەلەفونىمدى سىندىرىپ بەرسە، سەن سەنبە دەدى. مەن ولەيىن دەپ جاتىرمىن، مىنالار مەنى قاراپ جاتقان جوق دەدى. ول جالعىز ءوزى تاڭعا دەيىن قابىلداۋ بولىمىندە قينالىپ جاتقان. تاڭعى ساعات 7:30-دا مەدبيكە تاعى قوڭىراۋ شالدى. «كۇيەۋىڭىزدى الىپ كەتەسىز بە، جوق پا؟» دەدى”، – دەيدى شاراسىز ايەل.
ونىڭ ايتۋىنشا، باستاپقىدا كۇيەۋىنىڭ دەنساۋلىعىندا كىنارات جوق دەگەن دارىگەرلەر 2 ساعاتتان سوڭ قايتا قوڭىراۋ شالىپ، ونىڭ قايتىس بولعانىن جەتكىزگەن. ولىمگە ترومبتىڭ جارىلۋى سەبەپ بولعان دەپتى.
ال استانا قالالىق فتيزيوپۋلمونولوگيا ورتالىعىنىڭ باس دارىگەرى اننا تسەپكە قۇپيا جاعدايدا كوز جۇمعان ناۋقاسقا قاتىستى تولىققاندى مالىمەت بەرە الماعان. تىلشىلەرگە «تەك مارقۇمنىڭ ايەلى قۇزىرلى ورگاندارعا شاعىمدانعان جاعدايدا رەسمي جاۋاپ بولادى» دەپ قىسقا قايىرىپتى جاۋابىن.
