مەملەكەت باسشىسى قاسىم-جومارت توقاەۆتىڭ تاپسىرماسىمەن قازاقستاننىڭ حالىقارالىق دامۋ اگەنتتىگى KazAID يرانعا گۋمانيتارلىق كومەك جەتكىزدى. بۇل تۋرالى قازاقستاننىڭ سىرتقى ىستەر مينيسترلىگى مالىمدەدى، دەپ حابارلايدى "ادىرنا".
جۇكتى جەتكىزۋ جۇمىستارى توتەنشە جاعدايلار مينيسترلىگى، دەنساۋلىق ساقتاۋ مينيسترلىگى جانە سىرتقى ىستەر مينيسترلىگىنىڭ بىرلەسۋىمەن ۇيىمداستىرىلعان. گۋمانيتارلىق كومەكتى يران قىزىل جارتى اي قوعامىنا تاپسىرۋ ءراسىمى «سەراحس» تەمىرجول ستانتسياسىندا ءوتتى.
ۆەدومستۆونىڭ مالىمەتىنشە، گۋمانيتارلىق جۇكتىڭ قۇرامىنا ەت كونسەرۆىلەرى، قانت، ءبىرىنشى سورتتى ۇن، مەديتسينالىق بۇيىمدار مەن ءدارى-دارمەكتەر كىرگەن. قازاقستان تاراپىنان جىبەرىلگەن بۇل كومەك يران حالقىن قولداۋعا جانە الەۋمەتتىك ماڭىزى بار قاجەتتىلىكتەردى قامتاماسىز ەتۋگە باعىتتالعان.
قازاقستاننىڭ يرانداعى ەلشىسى ونتالاپ ونالباەۆتىڭ ايتۋىنشا، يران – تاياۋ شىعىستاعى جانە يسلام الەمىندەگى قازاقستاننىڭ ماڭىزدى ساياسي، ساۋدا-ەكونوميكالىق جانە گۋمانيتارلىق سەرىكتەستەرىنىڭ ءبىرى.
«دوستىق قيىن ساتتە تانىلادى. قازاقستان ءارتۇرلى كەزەڭدەردە يران حالقىنا ۇنەمى قولداۋ كورسەتىپ كەلدى»، - دەدى ەلشى.
يران قىزىل جارتى اي قوعامىنىڭ وكىلى بۇل قادام ەكى ەل اراسىنداعى ىنتىماقتاستىق پەن ءوزارا قولداۋدى ودان ءارى نىعايتۋعا ىقپال ەتەتىنىن اتاپ ءوتتى.
سىرتقى ىستەر مينيسترلىگىنىڭ حابارلاۋىنشا، جالپى 30 ۆاگوننان تۇراتىن گۋمانيتارلىق جۇك تەگەران قالاسىنا جەتكىزىلىپ، ءتيىستى مەكەمەلەرگە تاراتىلاتىن بولادى.
