"ادىرنا" ۇلتتىق پورتالىنىڭ YouTube ارناسىنا يران سۋرەتشىلەر وداعىنىڭ مۇشەسى، قازاقستاندىق سۋرەتشى اڭساعان مۇستافا قوناق بولدى. سۇحبات بارىسىندا ونەر، قوعام، ءدىن، جەكە ءومىر جانە شىعارماشىلىق جولى تۋرالى بىرقاتار ماڭىزدى تاقىرىپتار قوزعالدى.
سۋرەتشى يرانمەن بايلانىسى جايلى ايتىپ، ول جاقتاعى ارىپتەستەرىمەن قارىم-قاتىناسىن ساقتاپ وتىرعانىن جەتكىزدى. سونىمەن قاتار، ونىڭ ءبىر تۋىندىسى كورەياداعى مۋزەيگە قويىلعانى دا ءسوز بولدى.
قوعامداعى ايەل رولىنە توقتالعان ول، كەيبىر ەلدەردەگى قىزداردى شەكتەۋ مەن قىسىم كورسەتۋ ماسەلەسىن كوتەرىپ، ايەلدەردى تومەندەتپەي-اق ولاردىڭ مۇمكىندىگىن ارتتىرۋ قاجەت ەكەنىن اتاپ ءوتتى. بۇل رەتتە ول پروديۋسەر بايان ماقساتقىزىن قولدايتىنىن ءبىلدىردى.
ونەر مەن ءدىننىڭ اراقاتىناسى تۋرالى پىكىر بىلدىرگەن سۋرەتشى، كەي جاعدايدا ونەرگە قويىلاتىن شەكتەۋلەرمەن كەلىسپەيتىنىن اشىق ايتتى. ونىڭ ايتۋىنشا، سۋرەت سالۋعا تىيىم سالۋ – مادەنيەت پەن تاريحقا زيان كەلتىرۋى مۇمكىن.
سۇحبات سوڭىندا اڭساعان مۇستافا 17 ءساۋىر كۇنى ۇلتتىق مۋزەيدە وتەتىن جەكە كورمەسىنە كوپشىلىكتى شاقىردى. سونداي-اق، "پلاستيكا ارت" باعىتىمەن اينالىسىپ جۇرگەنىن جانە 50-گە جۋىق قازاقتىڭ ۇلتتىق ويۋ-ورنەگىن جيناقتاعانىن جەتكىزدى.
