نۇر-سۇلتان قالاسىندا قر پرەمەر-ءمينيسترى ءاليحان سمايىلوۆ پەن تۇركيا ۆيتسە-پرەزيدەنتى فۋات وكتايدىڭ توراعالىعىمەن ساۋدا-ەكونوميكالىق ىنتىماقتاستىق جونىندەگى قازاقستان-تۇركيا ۇكىمەتارالىق كوميسسياسىنىڭ XII وتىرىسى ءوتتى. بۇل تۋرالى “ادىرنا” ۇلتتىق پورتالى حابارلايدى preminister.kz سايتىنا سىلتەمە جاساپ.
وتىرىس بارىسىندا تاراپتار ەكى ەل اراسىنداعى ساۋدا-ەكونوميكالىق ىنتىماقتاستىقتى دامىتۋدىڭ اۋقىمدى ماسەلەلەرىن تالقىلادى. اتاپ ايتقاندا، ترانزيتتىك-كولىك، ونەركاسىپ، تۋريزم، گەولوگيا، دەنساۋلىق ساقتاۋ جانە اگروونەركاسىپتىك كەشەن سالالارىنداعى ءوزارا ءىس-قيمىل ماسەلەلەرى قارالدى. سونداي-اق ەكى ەل اراسىنداعى اۋە جولدارىنىڭ گەوگرافياسىن كەڭەيتۋ جانە تۇراقتى رەيستەر سانىن ارتتىرۋ قاجەتتىلىگىنە نازار اۋدارىلدى.
تۇركيا — قازاقستاننىڭ ماڭىزدى ساۋدا-ەكونوميكالىق جانە ينۆەستيتسيالىق سەرىكتەستەرىنىڭ ءبىرى. وتكەن جىلدىڭ قورىتىندىسى بويىنشا قازاقستان مەن تۇركيا اراسىنداعى تاۋار اينالىمى 33%-عا ءوسىپ، $4,1 ملرد استى. ەكى ەل ارىپتەستىگىنىڭ ستراتەگيالىق سيپاتىنا توقتالعان قر پرەمەر-ءمينيسترى 2021 جىلى قازاقستاننان تۇركياعا ەكسپورت 39%-عا ءوسىپ، شامامەن $3 ملرد جەتكەنىن، 2021 جىلى تۇركيادان قازاقستانعا يمپورت 20,5%-عا ارتىپ، $1,1 ملرد قۇراعانىن اتاپ ءوتتى.
بۇگىنگى تاڭدا تۇرىك بيزنەسى قازاقستاندا جالپى قۇنى $5,5 ملرد قۇرايتىن ينۆەستيتسيالىق جوبالاردى جۇزەگە اسىرىپ جاتىر. ءوز كەزەگىندە تۇركيا ۆيتسە-پرەزيدەنتى ف. وكتاي تۇركيا رەسپۋبليكاسى قازاقستانمەن بارلىق باعىتتار بويىنشا ەكىجاقتى ىنتىماقتاستىقتى ءارى قاراي نىعايتۋعا دايىن ەكەنىن، مۇنىڭ ءوزارا ءتيىمدى ارىپتەستىكتى دامىتۋعا ىقپال ەتەتىنىن اتاپ ءوتتى.
وتىرىس اياسىندا ەكونوميكالىق ىنتىماقتاستىق بويىنشا جان-جاقتى كەلىسسوزدەر جۇرگىزىلدى. قازاقستان تاراپىنان يندۋستريا جانە ينفراقۇرىلىمدىق دامۋ ءمينيسترى، ساۋدا جانە ينتەگراتسيا، ۇلتتىق ەكونوميكا، دەنساۋلىق ساقتاۋ ۆيتسە-مينيسترلەرى جانە باسقالارى قاتىستى. تۇرىك تاراپىنان يندۋستريا جانە تەحنولوگيا، ساۋدا، كولىك جانە ينفراقۇرىلىم، دەنساۋلىق ساقتاۋ ۆيتسە-مينيسترلەرى قاتىستى.
سوڭىندا ۇاك وتىرىسىنىڭ قورىتىندى حاتتاماسىنا قول قويىلىپ، بىرلەسكەن جوسپار قابىلداندى. رەسمي دەلەگاتسيا مۇشەلەرى ءوزارا ساۋدا-ەكونوميكالىق ىنتىماقتاستىقتىڭ وزەكتى ماسەلەلەرىن تالقىلاۋ ءۇشىن ەكىجاقتى كەزدەسۋلەر وتكىزدى.
”ادىرنا” ۇلتتىق پورتالى
