نەپال مەن قىتاي شەكاراسىنداعى جويقىن سۋ تاسقىنىنان كەيىن قازاقستاننىڭ ءۇش ازاماتى ءىز-ءتۇزسىز جوعالىپ كەتتى، دەپ حابارلايدى "ادىرنا" ۇلتتىق پورتالى.
بۇل تۋرالى قازاقستاننىڭ سىرتقى ىستەر مينيسترلىگى حابارلادى. بۇعان دەيىن ەكى قازاقستاندىق ايەلدىڭ جوعالعانى حابارلانعان بولاتىن. قازىر ولاردىڭ قاتارىنان ءۇشىنشى ازاماتشا دا تابيعي اپات بولعان اۋماقتا بولۋى مۇمكىن ەكەنى انىقتالدى. ۇشەۋىنىڭ دە قازىرگى ورنالاسقان جەرى بەلگىسىز. قازاقستاندىق ديپلوماتتار نەپال جانە قىتايدىڭ مەملەكەتتىك ورگاندارىمەن بايلانىستا بولىپ، جوعالعان ازاماتتاردى ىزدەۋ جۇمىستارىن جالعاستىرىپ جاتىر.
ەسكە سالايىق، 26 تامىزدا نەپالدا جويقىن سۋ تاسقىنى بولدى. تابيعي اپات سالدارىنان 160-تان استام ادام قازا تاپتى. الدىن الا مالىمەت بويىنشا، اپاتقا گيمالايداعى مۇزدىقتىڭ ءىرى بولىگىنىڭ وپىرىلىپ ءتۇسۋى سەبەپ بولعان.
27 تامىزدا مەملەكەت باسشىسى قاسىم-جومارت توقاەۆ قىتاي توراعاسى سي تسزينپينگە سيتسزان اۆتونوميالىق اۋدانىنداعى تابيعي اپاتقا بايلانىستى كوڭىل ايتۋ جەدەلحاتىن جولدادى. پرەزيدەنت قازا تاپقانداردىڭ جاقىندارىنا قولداۋ ءبىلدىرىپ، جوعالعان ازاماتتاردىڭ وتباسىلارىمەن تەزىرەك قاۋىشۋىنا ءۇمىت ارتاتىنىن جەتكىزدى.
