Memleket basşysy Qasym-Jomart Toqaevtyŋ tapsyrmasymen Qazaqstannyŋ halyqaralyq damu agenttıgı KazAID İranǧa gumanitarlyq kömek jetkızdı. Būl turaly Qazaqstannyŋ Syrtqy ıster ministrlıgı mälımdedı, dep habarlaidy "Adyrna".
Jüktı jetkızu jūmystary Tötenşe jaǧdailar ministrlıgı, Densaulyq saqtau ministrlıgı jäne Syrtqy ıster ministrlıgınıŋ bırlesuımen ūiymdastyrylǧan. Gumanitarlyq kömektı İran Qyzyl Jarty Ai qoǧamyna tapsyru räsımı «Serahs» temırjol stansiiasynda öttı.
Vedomstvonyŋ mälımetınşe, gumanitarlyq jüktıŋ qūramyna et konservılerı, qant, bırınşı sortty ūn, medisinalyq būiymdar men därı-därmekter kırgen. Qazaqstan tarapynan jıberılgen būl kömek İran halqyn qoldauǧa jäne äleumettık maŋyzy bar qajettılıkterdı qamtamasyz etuge baǧyttalǧan.
Qazaqstannyŋ İrandaǧy elşısı Ontalap Onalbaevtyŋ aituynşa, İran – Taiau Şyǧystaǧy jäne islam älemındegı Qazaqstannyŋ maŋyzdy saiasi, sauda-ekonomikalyq jäne gumanitarlyq serıktesterınıŋ bırı.
«Dostyq qiyn sätte tanylady. Qazaqstan ärtürlı kezeŋderde İran halqyna ünemı qoldau körsetıp keldı», - dedı elşı.
İran Qyzyl Jarty Ai qoǧamynyŋ ökılı būl qadam ekı el arasyndaǧy yntymaqtastyq pen özara qoldaudy odan ärı nyǧaituǧa yqpal etetının atap öttı.
Syrtqy ıster ministrlıgınıŋ habarlauynşa, jalpy 30 vagonnan tūratyn gumanitarlyq jük Tegeran qalasyna jetkızılıp, tiıstı mekemelerge taratylatyn bolady.
