بۇگىن شىعىس قازاقستان وبلىسىنىڭ اكىمى نۇرىمبەت ساقتاعانوۆ ەكولوگتار كۇنىنە وراي شقو ەكولوگيا دەپارتامەنتىنىڭ عيماراتىنا بارىپ، ۇجىمدى جانە بۇل سالادا جەمىستى جۇمىس ىستەپ كەلە جاتقان مامانداردى قۇتتىقتادى.
«شىعىس قازاقستان – تابيعاتى كوركەم، ورمان مەن وزەنگە، تاۋ-كولگە باي كيەلى ولكە. وسىنداي بىرەگەي تابيعي مۇرانى ساقتاۋ جانە كەلەر ۇرپاققا جەتكىزۋ جولىندا سىزدەر ابىرويلى قىزمەت اتقارىپ جۇرسىزدەر. مەملەكەت باسشىسى قاسىم-جومارت توقاەۆ ەكولوگيالىق مادەنيەتتى قالىپتاستىرۋ مەن ەلدى مەكەندەردى كوركەيتۋگە ەرەكشە نازار اۋدارىپ كەلەدى. وسى باعىتتا جۇزەگە اسىرىلىپ جاتقان «تازا قازاقستان» باستاماسى قوعامدى ورتاق ىسكە جۇمىلدىرىپ، قورشاعان ورتاعا دەگەن جاۋاپكەرشىلىكتى ارتتىرۋدا. تابيعاتتى قورعاۋ جولىنداعى يگى قىزمەتتەرىڭىز ءاردايىم جەمىستى بولسىن!»، - دەدى ايماق باسشىسى.
نۇرىمبەت ساقتاعانوۆ ءوز سوزىندە جۇمىستىڭ تيىمدىلىگى زاماناۋي تەحنيكا مەن تەحنولوگيالاردى ۇتىمدى پايدالانۋمەن ولشەنەتىندىگىن جەتكىزدى. ەكولوگيا دەپارتامەنتىنىڭ زەرتحاناسىندا 50 جىلدان استام ۋاقىت بويى جوندەۋ جۇمىستارى جۇرگىزىلمەگەن بولاتىن. قازىر عيمارات تولىق جاڭارتىلىپ، زاماناۋي قۇرال-جابدىقتارمەن قامتاماسىز ەتىلىپ جاتىر. بۇل باعىتتاعى جۇمىستار الداعى ۋاقىتتا دا جالعاسادى.
شارا سوڭىندا قورشاعان ورتانى قورعاۋعا ەلەۋلى ۇلەس قوسقان، ەل اراسىندا ەكولوگيالىق مادەنيەتتى دامىتۋعا جانە وبلىستى اباتتاندىرۋ مەن كوگالداندىرۋ جۇمىستارىنا بەلسەندى قاتىسقان جاندارعا العىس حاتتار تابىستالدى.
