قازاقستان مەن اقش اراسىنداعى ەكونوميكالىق ارىپتەستىك جاڭا دەڭگەيگە كوتەرىلۋى مۇمكىن. امەريكالىق Cove Capital جانە قازاقستاندىق «تاۋ-كەن سامۇرىق» كومپانيالارى ەلىمىزدە ءىرى ۆولفرام كەن ورنىن يگەرۋ تۋرالى كەلىسىمگە قول قويدى، دەپ حابارلايدى "ادىرنا" پورتالى Reuters-كە سىلتەمە جاساپ.
كەلىسىم اياسىندا Cove Capital بىرلەسكەن كاسىپورىننىڭ 70 پايىز ۇلەسىن يەلەنىپ، مەتاللدىڭ ساتىلۋىن باقىلايدى. ال «تاۋ-كەن سامۇرىق» كومپانياسىنا 30 پايىز ۇلەس تيەسىلى بولادى. شىعىس قازاقستان وبلىسىنداعى سولتۇستىك كاتپار مەن جوعارعى قايراقتى كەن ورىندارىن يگەرۋ جوباسىنىڭ جالپى قۇنى شامامەن 1,1 ميلليارد اقش دوللارىن قۇرايدى. بۇل سومانىڭ 900 ميلليون دوللارىن قارجىلاندىرۋعا اقش-تىڭ ەكسپورت-يمپورت بانكى قىزىعۋشىلىق تانىتقان.
ۆولفرام – ستراتەگيالىق ماڭىزى بار مەتالل. ول بولاتتى شىنىقتىرۋدا، سونداي-اق قورعانىس ونەركاسىبىندە كەڭىنەن قولدانىلادى. اقش-تا بۇل مەتالدىڭ ءوندىرىسى 2015 جىلدان بەرى توقتاپ تۇر، ال الەمدىك نارىقتا باستى ءوندىرۋشى ءارى جەتكىزۋشى ەل – قىتاي بولىپ سانالادى.
Cove Capital كومپانياسىنىڭ باسشىسى پيني التحاۋس بۇل جوبانى «اقش ءۇشىن ستراتەگيالىق ماڭىزدى جەڭىس» دەپ اتادى. ونىڭ ايتۋىنشا، كەلىسسوزدەرگە دونالد ترامپ پەن اقش-تىڭ ساۋدا ءمينيسترى گوۆارد لاتنيك تە تىكەلەي قاتىسقان. ولار كەن ورنىن قىتايلىق كومپانيالاردىڭ باقىلاۋىنا وتپەۋىن قاداعالاعان.
كومپانيا وكىلدەرىنىڭ مالىمەتىنشە، جوبانى سالۋ جۇمىستارى ەكى جىلدان كەيىن، ال ءوندىرۋ پروتسەسى ءۇش جارىم جىلدان سوڭ باستالادى. سونىمەن قاتار، رۋدانى قازاقستاندا وڭدەۋ جوسپارلانىپ وتىر. امەريكالىق تاراپ بۇل جوبادان الىناتىن ۆولفرامنىڭ باسىم بولىگى اقش ۇكىمەتى مەن امەريكالىق كومپانيالاردىڭ قاجەتتىلىكتەرىن وتەۋگە باعىتتالاتىنىن اتاپ ءوتتى.
بۇعان دەيىن Bloomberg اگەنتتىگى اقش ۇكىمەتىنىڭ قىتايعا تاۋەلدىلىكتى ازايتۋ ماقساتىندا قازاقستاندى ستراتەگيالىق سەرىكتەس رەتىندە قاراستىرىپ وتىرعانىن جازعان بولاتىن. Cove Kaz Capital كومپانياسى مەتالدى ەل ىشىندە ءوندىرۋ مەن قايتا وڭدەۋدى كوزدەيدى، ال اقش جاعى تەك قارجىلاي قولداۋ كورسەتەدى.
ايتا كەتەيىك، اقش مەملەكەتتىك حاتشىسى ماركو رۋبيو 2026 جىلى قازاقستان مەن باسقا دا ورتالىق ازيا ەلدەرىنە رەسمي ساپارمەن كەلۋدى جوسپارلاپ وتىر. ول ۆاشينگتوننىڭ وڭىردەگى مينەرالدىق رەسۋرستاردى ءوندىرۋ جانە وڭدەۋ باعىتىنداعى ىنتىماقتاستىقتى كەڭەيتۋگە نيەتتى ەكەنىن مالىمدەدى.
