67 جاستاعى برەد سيگمون، بۇرىنعى سۇيىكتىسىنىڭ اتا-اناسىن بەيسبول بيتاسىمەن ولتىرگەنى ءۇشىن سوتتالعان. ول سوڭعى 15 جىلدا اقش-تا اتۋ جازاسى ارقىلى ءولىم جازاسى ورىندالعان العاشقى سوتتالۋشى بولدى، دەپ حابارلايدى "ادىرنا" ۇلتتىق پورتالى.
ۆۆس مالىمەتىنشە، وڭتۇستىك كارولينا شتاتىنىڭ تۇزەۋ دەپارتامەنتىنىڭ مالىمەتىنشە، ءولىم جازاسى 8 ناۋرىز كۇنى جەرگىلىكتى ۋاقىتپەن 18:00-دەن كەيىن جۇزەگە اسىرىلعان. ونى ءۇش ارنايى دايىندالعان وفيتسەر ۆينتوۆكامەن اتتى.
سوتتالۋشى كامەرا ىشىندە ارنايى ورىندىققا بايلانعان، ال جۇرەك تۇسىنا قىزىل نىسانا بەلگىسى قويىلعان. كۋاگەرلەردىڭ ايتۋىنشا، اتۋ كەزىندە ونىڭ باسىنا قاپ كيگىزىلگەن.
سيگمون سوڭعى سوزىندە «مەنىڭ سوڭعى ءسوزىم – سۇيىسپەنشىلىك تۋرالى بولسىن» دەپ، حريستيان قاۋىمىن ءولىم جازاسىن جويۋعا شاقىردى. ونى اتۋ جازاسىنا كەسۋ تۋرالى شەشىم قابىلدانعاننان كەيىن، وعان ەلەكتر ورىندىعى، ءولىم ينەكتسياسى نەمەسە اتۋ جازاسىن تاڭداۋ مۇمكىندىگى بەرىلگەن. ول اتۋ جازاسىن تاڭداعان، سەبەبى باسقا ادىستەردىڭ تيىمدىلىگىنە كۇماندانعان.
بۇل اقش-تا 2010 جىلدان بەرى العاشقى اتۋ جازاسى ارقىلى ورىندالعان ءولىم جازاسى بولدى. سونداي-اق، 1976 جىلى ەلدە ءولىم جازاسىنا قويىلعان موراتوري الىنىپ تاستالعاننان بەرى، اتۋ ارقىلى ءولىم جازاسىنا كەسىلگەن ءتورتىنشى ادام رەتىندە تىركەلدى.
