فوتو: gov.kz
1 مامىر – قازاقستان حالىقتارىنىڭ بىرلىگى كۇنى. بۇل كۇنى قازاقستاندا تۇراتىن ءتۇرلى ۇلت پەن ۇلىس وكىلدەرىنىڭ دوستىعى، ءوزارا تۇسىنىستىگى مەن ىنتىماعى كەڭىنەن ناسيحاتتالادى.
اتالعان مەرەكە 1996 جىلدان باستاپ رەسمي تۇردە تويلانىپ كەلەدى. ونىڭ نەگىزىندە قوعامداعى تۇراقتىلىق پەن كەلىسىمدى نىعايتۋ يدەياسى جاتىر. قازاقستان – مادەنيەتتەرى، تىلدەرى مەن داستۇرلەرى سان الۋان حالىقتاردىڭ ورتاق شاڭىراعى. سوندىقتان بۇل كۇن ەلدەگى بىرلىك پەن تاتۋلىقتىڭ سيمۆولىنا اينالعان.
1995 جىلدىڭ ناۋرىزىندا قۇرىلعان قازاقستان حالقى اسسامبلەياسى ۇلتارالىق كەلىسىمدى قامتاماسىز ەتەتىن بىرەگەي ينستيتۋت رەتىندە تانىلدى. بۇل قۇرىلىم الەمدىك تاجىريبەدە بالاماسى سيرەك كەزدەسەتىن، ساياسي ماڭىزى زور ۇيىم سانالادى. بۇگىندە اسسامبلەيا قۇرامىندا جۇزدەگەن مۇشە مەن مىڭداعان ەتنومادەني بىرلەستىكتەر جۇمىس ىستەپ، قوعامداعى كەلىسىم مەن تۇراقتىلىقتى نىعايتۋعا ۇلەس قوسىپ كەلەدى.
قازاقستاندا ءاربىر ەتنوستىڭ ءوز مادەنيەتىن، ءتىلىن جانە سالت-ءداستۇرىن ساقتاپ، دامىتۋىنا بارلىق جاعداي جاسالعان. بۇل – ەلدەگى ىشكى ساياسي تۇراقتىلىق پەن ازاماتتىق كەلىسىمنىڭ ماڭىزدى فاكتورى. قازاقستان حالقىنىڭ بىرلىگى كۇنىن جاڭا تۇرپاتتا تويلاۋ قاجەتتىگىن، ونى ەلىمىزدىڭ باستى مەيرامىنا اينالدىرۋ يدەياسىن ەكس-پرەزيدەنت نۇرسۇلتان نازارباەۆ 2011 جىلى كوتەرگەن بولاتىن.
