Foto: gov.kz
1 mamyr – Qazaqstan halyqtarynyŋ bırlıgı künı. Būl künı Qazaqstanda tūratyn türlı ūlt pen ūlys ökılderınıŋ dostyǧy, özara tüsınıstıgı men yntymaǧy keŋınen nasihattalady.
Atalǧan mereke 1996 jyldan bastap resmi türde toilanyp keledı. Onyŋ negızınde qoǧamdaǧy tūraqtylyq pen kelısımdı nyǧaitu ideiasy jatyr. Qazaqstan – mädenietterı, tılderı men dästürlerı san aluan halyqtardyŋ ortaq şaŋyraǧy. Sondyqtan būl kün eldegı bırlık pen tatulyqtyŋ simvolyna ainalǧan.
1995 jyldyŋ nauryzynda qūrylǧan Qazaqstan halqy Assambleiasy ūltaralyq kelısımdı qamtamasyz etetın bıregei institut retınde tanyldy. Būl qūrylym älemdık täjıribede balamasy sirek kezdesetın, saiasi maŋyzy zor ūiym sanalady. Bügınde Assambleia qūramynda jüzdegen müşe men myŋdaǧan etnomädeni bırlestıkter jūmys ıstep, qoǧamdaǧy kelısım men tūraqtylyqty nyǧaituǧa üles qosyp keledı.
Qazaqstanda ärbır etnostyŋ öz mädenietın, tılın jäne salt-dästürın saqtap, damytuyna barlyq jaǧdai jasalǧan. Būl – eldegı ışkı saiasi tūraqtylyq pen azamattyq kelısımnıŋ maŋyzdy faktory. Qazaqstan halqynyŋ bırlıgı künın jaŋa tūrpatta toilau qajettıgın, ony elımızdıŋ basty meiramyna ainaldyru ideiasyn eks-prezident Nūrsūltan Nazarbaev 2011 jyly kötergen bolatyn.
