قىركۇيەكتىڭ سوڭعى جەكسەنبىسىندە ەلىمىزدە ەڭبەك كۇنى اتالىپ وتەدى. بۇل مەرەكە ادال ەڭبەكتى دارىپتەپ، ەل يگىلىگى ءۇشىن ايانباي تەر توگىپ جۇرگەن جانداردى ۇلىقتاۋعا ارنالعان.
ءوز ءومىرىن وزگەلەردىڭ اماندىعىنا ارناعان پوليتسيا قىزمەتكەرلەرىنىڭ ەرلىكتەرى – وسى مەرەكەنىڭ ءمانىن ايشىقتايتىن ايقىن مىسال.
جەزقازعان قالاسىندا جەتى جىل بۇرىن ورىن العان وقيعا ەل ەسىندە. قالا تۇرعىنىنىڭ ءۇيىن ءورت شارپىعان ساتتە پوليتسيا قىزمەتكەرى نۇرجان دۇيسەنبەك ەش ويلانباستان، قويۋ ءتۇتىن مەن جالىننىڭ اراسىنان بەس بالانى جانە ولاردىڭ اناسىن قۇتقارىپ قالدى. ءومىرىن قاتەرگە تىگىپ جاسالعان بۇل ارەكەت – شىنايى ەرلىكتىڭ ۇلگىسى.
جۋىردا جەزقازعان قالالىق پوليتسيا باسقارماسىنىڭ يۋۆەنالدىق پوليتسيا توبىنىڭ ۋچاسكەلىك ينسپەكتورى ازات ەسەنعابىلوۆ كاسىبيلىك پەن جانقيارلىق تانىتتى. ول اۆتوبۋستا ەسىنەن تانىپ قالعان جاسوسپىرىمگە دەر كەزىندە العاشقى مەديتسينالىق كومەك كورسەتىپ، جەدەل جاردەم كەلگەنگە دەيىن ونىڭ ءومىرىن ساقتاپ قالدى.
بۇل وقيعالار – پوليتسيا قىزمەتىنىڭ تەك قۇقىقتىق ءتارتىپتى قامتاماسىز ەتۋ عانا ەمەس، ەڭ الدىمەن ادام ءومىرىن قورعاۋ مەن قوعامعا قىزمەت ەتۋ ەكەنىن كورسەتەدى. ەل ءۇشىن ەتكەن ەرەن ەڭبەك پەن جانقيار ەرلىك – ناعىز ەڭبەك كۇنىنە لايىق ونەگە.
