ەلىمىزدەگى كەيبىر كوللەدج تۇلەكتەرى ۇبت تاپسىرماي-اق ۋنيۆەرسيتەتكە تۇسە الادى. بۇل تۋرالى ءماجىلىس دەپۋتاتى اسحات ايماعامبەتوۆ مالىمدەدى، دەپ حابارلايدى «ادىرنا» ءتىلشىسى.
ول پەداگوگ مارتەبەسى مەن ءبىلىم بەرۋ ماسەلەلەرى جونىندەگى زاڭ جوباسى اياسىندا بىرقاتار وزگەرىس ۇسىنىلىپ جاتقانىن اتاپ ءوتتى. ايتۋىنشا، عىلىمي بايقاۋلاردىڭ جەڭىمپازدارىنا ۇبت تاپسىرماي-اق گرانتقا ءتۇسۋ قۇقىعى بەرىلگەنى سياقتى، ەندى حالىقارالىق كاسىبي شەبەرلىك بايقاۋلارىنىڭ جەڭىمپازدارىنا، سونىڭ ىشىندە WorldSkills جارىسىنىڭ قاتىسۋشىلارىنا دا وسىنداي مۇمكىندىك بەرۋ ۇسىنىلىپ وتىر.
«كوللەدج تۇلەگى ءوز ماماندىعى بويىنشا الەمدە ۇزدىك اتانسا، ول دا پاندىك وليمپيادا جەڭىمپازى سياقتى قۇرمەتكە لايىق. سوندىقتان تالانتتى كوللەدج تۇلەكتەرىنە ۋنيۆەرسيتەتتەرگە گرانتقا ۇبت-سىز ءتۇسۋ قۇقىعىن بەرۋدى ۇسىنىپ وتىرمىز»،- دەدى دەپۋتات.
اسحات ايماعامبەتوۆ قازىرگى تاڭدا زاڭ جوباسى ماجىلىستە ءبىرىنشى وقىلىمدا قارالىپ جاتقانىن جەتكىزدى.
