عىلىم جانە جوعارى ءبىلىم مينيسترلىگى مەملەكەتتىك گرانتقا ىلىكپەگەن تالاپكەرلەرگە ۇندەۋ جاسادى، دەپ حابارلايدى «ادىرنا» ءتىلشىسى.
ء«ار ادام ومىرىندە ءتۇرلى اسۋلاردان وتەدى. كەيدە ۇلكەن جەتىستىككە جەتۋ ءۇشىن كىشىگىرىم سىناقتاردان سۇرىنبەي ءوتۋ قاجەت بولادى. ەگەر ءسىز بيىل مەملەكەتتىك ءبىلىم گرانتىنا ىلىگە الماعان بولساڭىز – بۇل ءۇمىتتىڭ ۇزىلگەنى ەمەس! گرانت – تەك ءبىر مۇمكىندىك. ال ءسىزدىڭ بويىڭىزداعى تالاپ، بىلىمگە دەگەن قۇشتارلىق پەن تاباندىلىق – ناعىز جەتىستىككە باستار باستى كۇش. ماقساتىنا سەنگەن ادام ەشقاشان جارتى جولدا قالمايدى.
ايتا كەتەيىك، بيىلعى كونكۋرسقا ءوتىنىش بەرۋشىلەر سانى وتكەن جىلمەن سالىستىرعاندا 9 مىڭعا كوپ، سوندىقتان باسەكەلەستىك تە وتە جوعارى بولدى. الايدا، بۇگىنگى تاڭدا ءبىلىم الۋعا مۇمكىندىك بەرەتىن ءبىر عانا مەملەكەتتىك گرانتپەن شەكتەلىپ قالۋعا بولمايدى. سىزگە قولجەتىمدى وزگە دە گرانتتار مەن جەڭىلدىكتەر بار»،—دەلىنگەن حابارلامادا.
مينيسترلىك تومەندەگى بالامالى مۇمكىندىكتەردى ۇسىندى:
ۋنيۆەرسيتەتىشىلىك رەكتور گرانتتارى
– بەلسەندى، وقۋ ۇلگەرىمى جاقسى، الەۋمەتتىك جاعدايى ەسكەرىلگەن تالاپكەرلەرگە وقۋ ورىندارى تاراپىنان بەرىلەتىن ارنايى گرانتتار. 2025 جىلى مۇنداي گرانتتاردىڭ جالپى سانى 2 000-نان استى. مىسالى، «تۇران-استانا» ۋنيۆەرسيتەتى نەگىزگى ۇبت-دان 100-دەن استام بال جيناپ، «التىن بەلگى» يەگەرى اتانعان تالاپكەرلەرگە 4 جىلدىق رەكتورلىق گرانتتار ۇسىنادى. ال حالىقارالىق تۋريزم جانە مەيماندوستىق ۋنيۆەرسيتەتى 680 ماقساتتى گرانت ءبولىپ وتىر.
جەرگىلىكتى اكىمدىك گرانتتارى
– الەۋمەتتىك از قامتىلعان نەمەسە سۇرانىسقا يە ماماندىق يەلەرىن دايىنداۋ ماقساتىندا وبلىستىق، قالالىق اكىمدىكتەر بولەتىن ءبىلىم گرانتتارى. مىسالى، 2025 جىلى جەرگىلىكتى اتقارۋشى ورگاندار باكالاۆريات باعدارلامالارى بويىنشا وقۋعا 1 700-دەن استام ءبىلىم گرانتىن ءبولدى.
جۇمىس بەرۋشىلەردىڭ ارنايى گرانتتارى
– بۇل گرانتتار جۇمىس بەرۋشى مەن جوعارى وقۋ ورنى اراسىندا جاسالعان كەلىسىم نەگىزىندە ۇسىنىلادى جانە بولاشاق مامانداردى جۇمىسپەن قامتۋ ماقساتىن كوزدەيدى.
جەكە دەمەۋشىلەر مەن قورلاردىڭ گرانتتارى
مىسالى، «قازاقستان حالقىنا» قوعامدىق قورى 500 گرانت ۇسىنادى، «KAZENERGY» قاۋىمداستىعى سولتۇستىك كاسپي جانە قاراشىعاناق جوبالارىنىڭ قاراجاتى ەسەبىنەن ينجەنەريا، IT, جاراتىلىستانۋ عىلىمدارى، اۋىل شارۋاشىلىعى جانە قىزمەت كورسەتۋ سالالارى بويىنشا وقۋعا تولەم جاساۋعا قولداۋ بىلدىرەدى، «قازاتومونەركاسىپ» ۇلتتىق اتوم كومپانياسى «Murager» ءبىلىم بەرۋ باعدارلاماسىن جۇزەگە اسىرىپ، اۋىلدىق جەرلەردەن شىققان جاستارعا ۋران ءوندىرۋ مەن وڭدەۋ، گەولوگيالىق بارلاۋ، يادرولىق وتىن تسيكلى، ەنەرگەتيكا، ەكولوگيا جانە عىلىم سالالارىمەن بايلانىستى باعىتتاردا گرانتتار ۇسىنادى.
سونىمەن قاتار كەيبىر تالاپكەرلەر گرانتتان باس تارتۋى مۇمكىن، وسى كەزدە مۇمكىندىك كەلەسى جوعارى بال جيناعان تالاپكەرلەرگە بەرىلەدى نەمەسە اقىلى بولىمدە وقۋدى باستاپ، كەيىنگى وقۋ كەزەڭىندە وقۋ ۇلگەرىمىنە قاراي بوس گرانتقا وتۋگە مۇمكىندىك بار.
مينيسترلىك وكىلدەرى تالاپكەرلەردى ءۇمىت ۇزبەۋگە, مۇمكىندىكتەردى زەرتتەپ، ارەكەت ەتۋگەشاقىردى.
ء«سىزدىڭ ارمانىڭىز – ءسىزدىڭ بولاشاعىڭىز. ول جولدا قولداۋ مەن مۇمكىندىك ءاردايىم تابىلادى! ەلىڭىز ءۇمىت ارتقان سىزدەردەي جاستىڭ بولاشاعى جارقىن بولارىنا سەنەمىز!»—دەلىنگەن حابارلامادا.
ايتا كەتەيىك، بيىل 77 مىڭنان استام تالاپكەر گرانت يەگەرى اتاندى.
