ورال قالاسىندا «تازا قازاقستان» رەسپۋبليكالىق ەكولوگيالىق اكتسياسى اياسىندا 1000 ءتۇپ اعاش كوشەتى وتىرعىزىلدى. يگىلىكتى شاراعا باتىس قازاقستان وبلىسىنىڭ اكىمى ناريمان تورەعاليەۆ، قوعام بەلسەندىلەرى، ارداگەرلەر مەن جاستار اتسالىستى.
جينالعاندار الدىمەن شاعان وزەنىنىڭ جاعالاۋىن تازالاپ، اباتتاندىردى. 500-دەن استام ادام قاتىسقان اكتسيادا قاراعاي، ۇيىڭكى، ءسۇمبىل تەرەك، شاعان اعاشتارىنىڭ كوشەتتەرى وتىرعىزىلدى.
ايماق باسشىسى پرەزيدەنت تاپسىرماسىنا سايكەس «تازا قازاقستان» رەسپۋبليكالىق ەكولوگيالىق اكتسياسى وڭىردە كەڭ كولەمدە جۇزەگە اسىرىلىپ جاتقانىن ايتىپ، قوعامدا ەكولوگيالىق مادەنيەتتى قالىپتاستىرۋ مەن تابيعاتتى ايالاۋدىڭ مەملەكەتتىك ماڭىزىنا توقتالدى.
2024 جىلدىڭ ءساۋىر ايىنان بەرى سەنبىلىكتەرگە 500 مىڭعا جۋىق باتىسقازاقستاندىق قاتىستى، 221 مىڭ گەكتار اۋماق تازارتىلدى، 172 مىڭ توننا قاتتى-تۇرمىستىق قالدىقتار ارنايى پوليگوندارعا شىعارىلدى، 313 085 ءتۇپ اعاش ەگىلدى. اۋقىمدى كوگالداندىرۋ اياسىندا كەيىنگى 5 جىلدا وبلىستاعى مەملەكەتتىك ورمان قورى اۋماعىندا 41 ملن دانا اعاش، ال ەلدى مەكەندەردە 727 مىڭ دانا اعاش وتىرعىزىلدى. تابيعاتتى قورعاۋ – قۇر ءسوز ەمەس، ول بارشامىزدىڭ ورتاق بورىشىمىز. حالىقتىڭ ءومىر ساپاسىن جاقسارتۋ مەن اينالانى كوركەيتۋ باعىتىنداعى جۇمىستار الداعى ۋاقىتتا دا جۇيەلى تۇردە جالعاسادى، -دەدى ناريمان تورەعاليەۆ.
اكتسيا ءوڭىر اۋداندارىندا دا ۇيىمداستىرىلدى. 120000 مىڭ ادام بەلگىلەنگەن اۋماقتاردى كوڭ-قوقىستان ارىلتىپ، تال-تەرەكتەر وتىرعىزدى.
