بۇگىن ورالداعى قالالىق مادەنيەت جانە دەمالىس ساياباعىندا «تازا قازاقستان» ەكولوگيالىق اكتسياسى اياسىندا اۋقىمدى شارا ءوتتى.
ونىڭ اياسىندا شاعان وزەنىنىڭ جاعالاۋىنا جاپىراقتى جانە قىلقان جاپىراقتى اعاشتاردىڭ 50 كوشەتى وتىرعىزىلدى. تابيعات قورعاۋ شاراسىنا 50-دەن استام ستۋدەنت جاس پەن جەرگىلىكتى بيلىك وكىلدەرى، ەرىكتىلەر مەن ءتۇرلى ۇيىمداردىڭ ماماندارى قاتىستى.
تاڭمەن تالاسا «تازا قازاقستان» جوباسى اياسىنداعى ەكواكتسياعا قاتىسۋشىلار قولدارىنا كۇرەك، تىرناۋىش الىپ، كوتەرىڭكى كوڭىل-كۇيمەن جۇمىسقا كىرىستى. بىرنەشە ساعات بويى ولار قۋراعان جاپىراقتاردى جيناپ، قوقىستى تازالاپ، گۇلزارلار مەن ورىندىقتاردى قالىپقا كەلتىردى. سونداي-اق جاسىل جەلەك وتىرعىزدى. جەرگىلىكتى بيلىك وكىلدەرى وبلىستا تازالىق شاراسى جوعارى دەڭگەيدە ۇيىمداستىرىلىپ جاتقانىن تىلگە تيەك ەتتى.
«جالپى، بيىل تەك ورال قالاسىنىڭ وزىندە رەسپۋبليكالىق جوبا اياسىندا 18 مىڭعا جۋىق اعاش وتىرعىزۋدى جوسپارلاپ وتىرمىز»، — دەدى باتىس قازاقستان وبلىسى اكىمىنىڭ ورىنباسارى قاليار ايتمۇحامبەتوۆ.بۇل كۇنى سەنبىلىك پەن كوگالداندىرۋ جۇمىستارى 21 ورىندا جۇرگىزىلدى. تابيعات قورعاۋ اكتسياسى قار تۇسكەنشە جالعاسپاق.
ورال قالاسىنىڭ اكىمى مۇرات بايمەنوۆتىڭ ايتۋىنشا، مادەنيەت جانە دەمالىس ساياباعىنداعى اعاشتاردىڭ باسىم بولىگى ءجۇز جىلدان استام ۋاقىت بويى ءوسىپ تۇر. سوندىقتان ورمان القابىن جاڭارتىپ، كوگالداندىرۋدى جۇيەلى تۇردە جۇرگىزۋ اسا ماڭىزدى. بەلسەندى جاستاردىڭ، «ورال جاستارى» ۇيىمى مۇشەلەرىنىڭ، ستۋدەنتتەر مەن ەرىكتىلەردىڭ قوسقان ۇلەسى ەرەكشە اتاپ ءوتىلدى.— «مەن بۇل جەرگە توپتاستارىممەن بىرگە ءوز اعاشىمدى وتىرعىزۋعا كەلدىم. وسىنداي شارالارعا قاتىسۋىمىز ماڭىزدى دەپ سانايمىن. ەرتەڭ وسى اعاشتاردىڭ ساياسىندا اتا-انام، اتام مەن اجەم دەمالاتىن بولادى. بۇل ىسكە مەنىڭ دە ۇلەسىم بار ەكەنىنە قۋانىشتىمىن»، — دەيدى م. وتەمىسوۆ اتىنداعى بقۋ-دىڭ 1-كۋرس ستۋدەنتى رابيا تولەۋوۆا.
جاستارعا باسىمدىق بەرىلگەن تازالىق اكتسياسىندا ستۋدەنتتەر ءوز قولدارىمەن جاس جەلەكتەردى وتىرعىزىپ، ولاردىڭ بولاشاقتا جايقالىپ، جاسىل ورماننىڭ ءبىر بولىگىنە اينالۋى ءۇشىن قامقورلىق تانىتاتىندارىن جەتكىزدى.— جەكە ءوزىم ومىرىمدە 30-40 شاقتى اعاش وتىرعىزدىم. اۋلامدا، تۋعان قالامنىڭ كوشەلەرىندە ءدال وسىنداي اكتسيالار كەزىندە وتىرعىزدىم. ءوزىم اتىراۋ قالاسىنىڭ تۋماسىمىن، الايدا قازىر ورالدا ءبىلىم الىپ جاتىرمىن. سول سەبەپتى وسىندا، وقىپ جاتقان قالامدى كوگالداندىرۋدى ماڭىزدى سانايمىن، — دەيدى م. وتەمىسوۆ اتىنداعى بقۋ ستۋدەنتى دامير يۆان.
ءىس-شارانىڭ ماقساتى — تەك تازالىق ورناتۋ عانا ەمەس، سونىمەن قاتار قالا تۇرعىندارىنىڭ تابيعاتقا جانە قوعامدىق كەڭىستىكتەرگە دەگەن جاۋاپكەرشىلىگىن ارتتىرۋ. «جينالعان جەر ەمەس، شاشىلماعان جەر تازا» ەكەنىن ەسكە العان جاستار ورالدىقتاردى ءوز قالالارىن ايالاۋعا شاقىردى.— ساياباقتا قازىر الپىستان اسا جاس جۇمىستانىپ جاتىر. سەنبىلىككە ۇلەس قوسۋعا نيەتتەنگەن ستۋدەنتتەردىڭ قاتارى قالىڭ. ءبىز ولاردى بولىنگەن اۋماقتارعا جىبەردىك. ايتا كەتەتىن جاعداي — سوڭعى كەزدەرى جوعارى سىنىپ وقۋشىلارى دا ىقىلاس ءبىلدىرىپ وتىر. بولاشاقتا ولاردى دا وسىنداي تابيعات جاناشىرلارىنىڭ قاتارىنا قوسۋ كەرەك دەپ ويلايمىن. قاتىسقان بارشا تۇرعىندارعا العىسىمىزدى بىلدىرەمىز. ورتاق كۇش-جىگەردىڭ ارقاسىندا ساياباقتىڭ كەلبەتى ايتارلىقتاي جاقساردى. مۇنداي يگى شارالار جاقسى داستۇرگە اينالادى دەپ سەنەمىز»، — دەيدى بقو جاستارمەن جۇمىس جونىندەگى رەسۋرستىق ورتالىعىنىڭ باسشىسى انسار يبراەۆ.
تازا اۋا، اۋەزدى ءان تابيعات قورعاۋشىلارىنا كوتەرىڭكى كوڭىل-كۇي سىيلادى. ۇيىمداستىرۋشىلار ساياباقتى اباتتاندىرۋ جۇمىستارىن جالعاستىرۋعا ۋادە بەرىپ، الداعى ەكولوگيالىق باستامالارعا دا ۇلەس قوساتىندارىن ايتتى.
