ورال قالاسىندا اقىن، ۇستاز، جۇبانتانۋشى ۇزىلدىك ەلەۋباەۆامەن كەرەمەت كەزدەسۋ ءوتتى. كەش كەيىپكەرى – بيىل 70 جاسقا تولعان «ەرەن ەڭبەگى ءۇشىن» مەدالىنىڭ يەگەرى، سانالى ءومىرىنىڭ باقانداي 42 جىلىن ۇرپاق تاربيەسىنە ارناعان ارداگەر ۇستاز. بۇعان دەيىن وسىنداي ءىس-شارا جۇبان مولداعاليەۆ اتىنداعى وبلىستىق امبەباپ- عىلىمي كىتاپحانادا جانە اقجايىق اۋدانىندا وتكەن بولاتىن. وعان قوسا قادىر سارايىنىڭ ۇجىمىنا العىسىن جەتكىزىپ، ءومىر جولى، شىعارماشىلىعى تۋرالى ءسوز قوزعادى.
اقجايىق ەلىنە ابىروي مەن بەدەلى بار، ءالى دە اتتان تۇسپەي اۋىل-ەلدىڭ، قالا بەردى قالالىقتاردىڭ مۇڭىن ءبىلىپ، جوعىن جوقتاپ جۇرگەن جانعا ەلدىڭ پەيىلى ەرەكشە. بقو مادەنيەت، تىلدەردى دامىتۋ جانە ارحيۆ ءىسى باسقارماسى باسشىسىنىڭ م.ا ت.عابدۋشەۆ كەش يەسىن قۇتتىقتاپ، ەستەلىك سىيلىق جاساپ، يىعىنا قازاقى ناقىشتاعى كيىمدى جاپتى.
ءوز كەزەگىندە اقجايىق اۋدانى اكىمىنىڭ ورىنباسارى باقبەرگەن ءابۋوۆ تە ۇستاز اقىندى اۋدان باسشىلىعى مەن اۋدان حالقى اتىنان قۇتتىقتاپ، ۇزىلدىك ەلەۋبايقىزىنىڭ 70 جاسىنا ارنالعان ءىس-شارالار جاز ايلارىندا دا جالعاساتىنىن اتاپ ءوتتى. اقىن، قازاقستان جازۋشىلار وداعىنىڭ مۇشەسى تالاپ تايماسۇلى قالامگەردىڭ جۋىردا جارىققا شىققان «بوزتورعايىمىن دالامنىڭ» كىتابىنا ەنگىزىلگەن ولەڭدەرى جايىندا وي-پىكىرىن ورتاعا سالىپ، «توعىس» اتتى اۆتورلىق جيناعىن تارتۋ ەتتى.
قر ەڭبەك سىڭىرگەن ءارتىسى، ءانشى-تەرمەشى، ساۋلە تاۋداەۆا دا قادىر ساحناسىندا اقىن تۋرالى جىلى پىكىرلەرىن بىلدىرسە، جازۋشىلار وداعىنىڭ ورال فيليالى توراعاسىنىڭ ورىنباسارى مارلەن عيلىمحان وڭىردەگى بارشا قالامگەردىڭ سالەمىن جەتكىزىپ، گۇل شوقتارىن تابىس ەتتى.
شارا بارىسىندا كەش يەسىنىڭ سوزىنە جازىلعان جانە باسقا دا تاقىرىپقا ساي اندەردى ءا.قۋانعاليەۆ، ا.بازاروۆ، سونىمەن قاتار "اجە سالەمى" كۆارتەتى شىرقاپ، بەلگىلى ءانشى-كومپوزيتور ە.اقباسوۆ قادىر مىرزا ءالىنىڭ سوزىنە جازىلعان ء"ومىر" اتتى ءانىن ورىندادى.
