ورال تۇرعىنىنا سەپاراتيزمدى ناسيحاتتادى دەگەن ايىپ تاعىلدى

2365
Adyrna.kz Telegram

ورال تۇرعىنىنا سەپاراتيزمدى ناسيحاتتادى دەگەن ايىپ تاعىلدى. بۇل تۋرالى باتىس قازاقستان وبلىستىق سوتتىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.

جەرگىلىكتى تۇرعىنعا قاتىستى قىلمىستىق ءىس ورال قالالىق سوتىندا قارالادى.  اقپارات بويىنشا، سوت پروتسەسى 11 قازاندا وتەدى.

جۋرناليست لۇقپان احمەدياروۆ بۇعان ورالدىق ماكسيم ياكوۆچەنكونىڭ الەۋمەتتىك جەلىدەگى جازباسى سەبەپ بولعانىن جازدى.

ونىڭ ايتۋىنشا، ورال تۇرعىنى «ورال، پەتروپاۆل، پاۆلودار جانە تاعى باسقالارىن رەسەيگە بەرۋ كەرەك. سەبەبى مۇنداعى ءبارىن جويادى. جاتجەرلىك بيلىكتە وتىر. جاتجەرلىكتەر ءبارىن لاستايدى. مايمىلدار جان-جاعىن جايپاپ، كوشىپ جۇرگەنگە ۇيرەنگەن» دەپ جازعان.

ماكسيم ياكوۆچەنكوعا قىلمىستىق كودەكستىڭ ەكى بابى بويىنشا ايىپ تاعىلعان: 174-بابى «الەۋمەتتiك، ۇلتتىق، رۋلىق، ناسiلدiك، تەكتىك-توپتىق نەمەسە دiني الاۋىزدىقتى قوزدىرۋ» جانە 180-بابى «سەپاراتيستىك ارەكەت».

پوليتسيا باستاپقىدا «الاۋىزدىقتى قوزدىرۋ» بابى بويىنشا تەرگەۋدى باستاعان. كەيىننەن وعان سەپاراتيستىك ارەكەتكە قاتىستى ايىپ تاعىلعان باپ قوسىلدى.

”ادىرنا” ۇلتتىق پورتالى

پىكىرلەر