شىعىس قازاقستان وبلىسىنىڭ شەمونايحا اۋدانىندا جاڭا اۋرۋحانا قۇرىلىسى كەزىندە ادام سۇيەكتەرى تابىلدى، دەپ حابارلايدى "ادىرنا" ۇلتتىق پورتالى.
كۋاگەرلەردىڭ ايتۋىنشا، قۇرىلىس الاڭىنان باس سۇيەك، جاق سۇيەگى، قول-اياق سۇيەكتەرى انىقتالعان. الايدا سوعان قاراماستان قۇرىلىس جۇمىستارى توقتاتىلماعانى جەرگىلىكتى تۇرعىنداردىڭ نارازىلىعىن تۋدىردى.
تۇرعىندار قازىلعان توپىراقتىڭ سۇيەكتەرمەن بىرگە باسقا اۋماقتارعا شىعارىلىپ جاتقانىنا الاڭداپ وتىر. ولاردىڭ پىكىرىنشە، جاۋىن-شاشىن كەزىندە بۇل قالدىقتار وزەنگە ءتۇسۋى مۇمكىن دەگەن قاۋىپ بار. جەرگىلىكتى حالىق بۇل اۋماقتا بۇرىن قورىم بولعانىن، سونداي-اق ۇلى وتان سوعىسى جىلدارى گوسپيتال جۇمىس ىستەگەنىن ايتىپ، وندا قايتىس بولعاندار جەرلەنۋى مۇمكىن ەكەنىن بولجايدى.
تۇرعىندار قۇرىلىس جۇمىستارىن دەرەۋ توقتاتىپ، تولىق تەكسەرۋ جۇرگىزۋدى تالاپ ەتۋدە.
شىعىس قازاقستان وبلىسى اكىمدىگىنىڭ مالىمەتىنشە، بۇل اۋماقتا بۇرىن دا ادام جەرلەنگەن ورىندار بولعان. كەيىن ول جەردە ينفەكتسيالىق اۋرۋحانا سالىنعان. اكىمدىك وكىلدەرى مۇنداي جاعدايلاردىڭ بۇرىن دا تىركەلگەنىن اتاپ ءوتتى.
رەسمي اقپاراتقا سايكەس، تابىلعان سۇيەكتەر تاريحي قۇندىلىققا جاتپايدى جانە قايتا جەرلەۋ راسىمدەرى جۇرگىزىلەدى. ۆەدومستۆو بارلىق جۇمىستار زاڭ اياسىندا اتقارىلىپ جاتقانىن مالىمدەدى.
