ورالدا ءۇش جاسار قىز بالا باقشادا اۋىر كۇيىك الىپ، جانساقتاۋ بولىمىنە ءتۇستى، دەپ حابارلايدى "ادىرنا" پورتالى «موي گورود»-قا سىلتەپ.
«وقيعا 10 قازان كۇنى سولتۇستىك-شىعىس شاعىن اۋدانىندا ورنالاسقان «بالبوبەك» بالاباقشاسىندا بولدى. بالانىڭ اناسىنىڭ ايتۋىنشا، تۇسكى ۋاقىتتا وعان مەكتەپكە دەيىنگى مەكەمەدەن تەلەفون سوعىپ، تەز ارادا كەلۋىن سۇراعان. وقيعا ورنىنا جەتكەن ايەل قىزىنىڭ كۇيىپ قالعانىن كوردى»، - دەلىنگەن سارسەنبى كۇنى حاباردا.
بالانىڭ بەتىن، قولىن جانە ەكى اياعىن كۇيىك شالعان.
«جەدەل جاردەم كەلىپ، قاجەتتى العاشقى مەديتسينالىق كومەك كورسەتتى. قازىر بالا جانساقتاۋ بولىمىندە جاتىر، جاعدايى اۋىر. بىزگە قايناعان كوجە بەرگەنى ءۇشىن بالاباقشانىڭ بۇكىل باسشىلىعى مەن اسپازدار جازالانسا ەكەن دەيمىن. قايناپ تۇرعان كوجەنى ءبىر بالا يتەرىپ جىبەرگەن. كۇتۋشى قايدا قاراعان؟ تاربيەشىلەر قايدا بولدى؟ اسپازدار قايدا قاراپ تۇردى؟ – دەپ جازدى ايەل الەۋمەتتىك جەلىدە.
بالاباقشا ادىسكەرى بالانىڭ ورتاڭعى توپقا بارعانىنا ءبىر اي عانا بولعانىن حابارلادى.
باتىس قازاقستان وبلىسى دەنساۋلىق ساقتاۋ باسقارماسىنىڭ ءباسپاسوز قىزمەتى حابارلاعانداي، جەدەل جاردەم ستانتسياسىنا قوڭىراۋ ساعات 12.33-تە تۇسكەن. مۇعالىمدەر بالانىڭ سورپانى ابايسىزدا ۇستىنە توگىپ العانىن حابارلادى.
«ءۇش جاسار قىزدىڭ باسى، كەۋدەسى، وڭ، سول جانە وڭ جامباسىنان جوعارعى جانە تومەنگى جاقتارى تەرميالىق كۇيىك العان. ول قازىر وبلىستىق كوپسالالى بالالار اۋرۋحاناسىنىڭ جانساقتاۋ بولىمىندە جاتىر. دارىگەرلەر ونىڭ جاعدايىن اۋىر دەپ باعالاپ وتىر. تەرىنىڭ 20-25 پايىزىن كۇيىك شالعان»، - دەلىنگەن حابارلامادا.
قر قىلمىستىق كودەكسىنىڭ 141-بابى (بالالاردىڭ ءومىرى مەن دەنساۋلىعىنىڭ قاۋىپسىزدىگىن قامتاماسىز ەتۋ جونىندەگى مىندەتتەردى تيىسىنشە ورىنداماۋ) بويىنشا قىلمىستىق ءىس قوزعالدى.
«ال، ورال قالالىق ءبىلىم ءبولىمى ورەسكەل زاڭ بۇزۋشىلىققا جول بەرگەن مۇعالىم مەن كۇتۋشى جۇمىستان بوساتىلاتىنىن حابارلادى. ال باسشىنىڭ مىندەتىن اتقارۋشى «قاتاڭ سوگىس» الادى»، - دەپ تولىقتىردى باسىلىم.
