باتىس قازاقستان وبلىسىنىڭ اكىمدىگى دەنساۋلىق ساقتاۋ باسقارماسىنىڭ شارۋاشىلىق جۇرگىزۋ قۇقىعىنداعى وبلىستىق كوپ بەيىندى اۋرۋحاناسى «2024 جىلعا ارنالعان كارتريدجدەردى تولتىرۋ قىزمەتى» دەگەن اتاۋمەن تەندەر جاريالادى، - دەپ حابارلايدى ادىرنا ۇلتتىق پورتالى satypalu.gov.kz سايتىنا سىلتەمە جاساپ.
تەندەرگە قۇجاتتار تاپسىرۋ 16 قاڭتاردا باستالادى. جەڭىمپاز 31 قاڭتار كۇنى انىقتالادى. ءبىر قىزىعى، مەملەكەتتىك ساتىپ الۋ پورتالىندا وبلىستىق بيۋدجەتتەن 4 ميلليون 200 مىڭ تەڭگە بولىنگەن تەندەر حابارلاماسى ءبىر اپتا بۇرىن جاريالانعان. بۇعان دەيىنگى جاريالانىمدار تەك «ءوتىنىمدى قابىلداۋ كۇنى» باستالعاندا كوپشىلىك نازارىنا ۇسىنىلاتىن.
تەندەرگە قاتىسۋشىلار نەگىزىنەن جاڭا جاريالانعان حابارلامانى ىزدەيدى. دەمەك، باتىس قازاقستان وبلىسىاكىمدىگى دەنساۋلىق ساقتاۋ باسقارماسىنا قاراستى اۋرۋحانانىڭ بۇل تەندەرى 16 قاڭتار كۇنى باس بەتتەن كورىنبەي، بىرنەشە بەت استىعا ءتۇسىپ كەتەدى دەگەن ءسوز. بۇل 4 ميلليون 200 مىڭ تەڭگەلىك حابارلامانى جاسىرۋدىڭ جولى ەمەس پە؟
تەحنيكالىق سيپاتتاما «جانارماي قۇيۋعا ءوتىنىم بەرۋ جانە كارتريدجدەردى تولتىرۋ بويىنشا باسقا دا ماسەلەلەر ورىنداۋشىنىڭ بايلانىس ورتالىعى (كولل-ورتالىعى) ارقىلى جۇزەگە اسىرىلادى» دەگەن جاڭىلتپاش سويلەممەن باستالعان. «جانارماي قۇيۋعا ءوتىنىم بەرۋ» دەگەن نە؟ اۋرۋحانا پرينتەرگە بەنزين قۇيماق پا؟ ۇزىن-سونار تەحنيكالىق سيپاتتامادان تۇسىنگەنىمىز اۋرۋحانا 4 ميلليون 200 مىڭ تەڭگەگە 5 468 مارتە كارتريدج تولتىرماق ەكەن. ءار كارتريدجدى تولتىرۋ قۇنى شامامەن 769 تەڭگەگە باعالانعان. بار بولعانى 30 ءتۇرلى پرينتەر ماركاسى كورسەتىلگەن. ولاردىڭ ىشىندە ءبىر جىلدا 778 مارتە كارتريدج تولتىرۋ كەرەك «HP LaserJet Pro M102a» دەگەن ماركا بار. مۇنداي ماركالى قانشا پرينتەر بار ەكەنى جازىلماعان.
5 468 مارتە كارتريدج تولتىرۋدى جىلدىڭ 365 كۇنىنە بولسەك، تاپسىرىس ورىنداۋشى كۇنىگە 15 پرينتەرگە قىزمەت كورسەتۋى كەرەك.
وبلىستىق كوپ بەيىندى اۋرۋحانادا قانشا پرينتەر بار؟ ءبىزدى وسى سۇراق مازالايدى؟ بۇل سۇراقتىڭ جاۋابىن ءتيىستى مەكەمە ناقتى بەرمەسە، وبلىس بيۋدجەتىنەن بولىنگەن 4 ميلليون 200 مىڭ تەڭگەنىڭ دۇرىس ماقساتتا جۇمسالىپ جاتقانىنا كوز جەتكىزە المايتىنىمىز انىق. سول سەبەپتى كۇمان تۋدىرعان ساۋالداردى اتالعان مەكەمەگە جولدادىق. جاۋاپ كەلىپ جاتسا، ونى دا جاريالايتىن بولامىز.
قانات بىرلىكۇلى
ادىرنا ۇلتتىق پورتالى
