قازاقستان پرەمەر-ءمينيسترى ولجاس بەكتەنوۆ ترانزيتتىك-كولىك سالاسىن دامىتۋ جونىندەگى پرەزيدەنت تاپسىرمالارىنىڭ ورىندالۋىن تالقىلاعان كەڭەستە ءپروفيلدى ۆەدومستۆولارعا ازەربايجان جانە گرۋزيامەن تسيفرلىق جۇيەلەردى ينتەگراتسيالاۋدى قامتاماسىز ەتۋدى تاپسىردى. بۇل باستاما ترانسكاسپي حالىقارالىق كولىك باعىتىن (ورتا ءدالىز) دامىتۋعا باعىتتالعان، دەپ حابارلايدى "ادىرنا".
ۇكىمەت مالىمەتىنشە، قازاقستان اتالعان مارشرۋتتى ستراتەگيالىق باعىت رەتىندە قاراستىرادى. قازىرگى ۋاقىتتا تحكب بويىمەن جۇك جەتكىزۋ مەرزىمىن قىسقارتۋ، «التىنكول – پوتي/باتۋمي» باعىتى بويىنشا بىرىڭعاي تاريف ەنگىزۋ، سونداي-اق تسيفرلىق پلاتفورمالاردى ءوزارا بىرىكتىرۋ جۇمىستارى جۇرگىزىلىپ جاتىر.
سونىمەن قاتار تەمىرجول سالاسىندا جالپى ۇزىندىعى 3,9 مىڭ شاقىرىمدى قۇرايتىن ءىرى ينفراقۇرىلىمدىق جوبالار ىسكە اسىرىلۋدا.
كەڭەستە تەڭىز تاسىمالىن دامىتۋ ماسەلەلەرى دە قارالدى. اتاپ ايتقاندا، اقتاۋ – باكۋ باعىتى بويىنشا جۇك اينالىمىن ارتتىرۋ، اقتاۋ جانە قۇرىق پورتتارىنىڭ الەۋەتىن كۇشەيتۋ شارالارى تالقىلاندى. بيىل اقتاۋ پورتىندا 1,3 ملن تەكشە مەتر كولەمىندە ءتۇبىن تەرەڭدەتۋ جۇمىستارى جۇرگىزىلمەك.
پرەمەر-مينيستر اقتاۋ – باكۋ باعىتىنا قاتىنايتىن التى كونتەينەرلىك كەمەنى ساتىپ الۋ راسىمدەرىنىڭ سوزىلىپ كەتكەنىنە نازار اۋدارىپ، جاڭا كەمەلەردى ىسكە قوسۋ پروتسەسىن جەدەلدەتۋدى تاپسىردى.
ۇكىمەتتە ورتا ءدالىزدى دامىتۋ قازاقستاننىڭ ترانزيتتىك الەۋەتىن ارتتىرىپ، ەۋروپا مەن ازيا اراسىنداعى لوگيستيكالىق بايلانىستاردى نىعايتۋعا مۇمكىندىك بەرەتىنى اتاپ ءوتىلدى.
