قازاقستان «بايقوڭىر» كەشەنىندەگى بىرقاتار نىسانداردى ءوز بالانسىنا قايتارۋعا نيەتتى. بۇل جونىندە پرەمەر-مينيستر ولجاس بەكتەنوۆ مالىمدەدى، دەپ حابارلايدى “ادىرنا”.
«بايقوڭىر» كەشەنىنىڭ تۋريستىك الەۋەتىنە ەرەكشە نازار اۋدارىلىپ وتىر. ونى كەڭەيتۋ ماقساتىندا «Kazakh Tourism» اق كەشەن اۋماعىندا ءتۋريزمدى دامىتۋ تۇجىرىمداماسىن ازىرلەۋ جۇمىستارىن جۇرگىزۋدە. 2024 جىلدىڭ قاراشا ايىندا ۇلتتىق ناقىشتا كيىز ءۇي تىگىلىپ، «سويۋز» زىمىراندارىنىڭ ۇشىرىلۋىن باقىلاۋعا ارنالعان QAZQOSMOS باقىلاۋ پۋنكتى سالىندى. سونىمەن قاتار، قازاقستاندىق تاراپقا قايتارىلاتىن جانە جالعا بەرىلەتىن بىرقاتار تۋريستىك تارتىمدى نىساندار بويىنشا جۇمىس جۇرگىزىلۋدە. ولار: «نولدىك كۆارتال»، گاگارين سامالجايى (10-الاڭ), «كوتتەدج» قوناقۇيى (2ج-الاڭ), مونتاجدىق-زاريادتاۋ كەشەنى (112ا-الاڭ), ديناميكالىق سىناق ستەندى (112د-الاڭ). «گاگارين ستارتى» نىسانىن جالعا بەرۋ پروتسەسىن وسى جىلدىڭ ءبىرىنشى جارتىجىلدىعىندا اياقتاۋ جوسپارلانىپ وتىر»، – دەدى بەكتەنوۆ ءماجىلىس دەپۋتاتتارىنىڭ ساۋالىنا جاۋاپ بەرە وتىرىپ.
سونداي-اق، ونىڭ ايتۋىنشا، «ينفراكوس» رەسپۋبليكالىق مەملەكەتتىك كاسىپورنى قازاقستاندىق جانە رەسەيلىك تۋروپەراتورلارمەن قىزمەت كورسەتۋ شارتتارى بويىنشا كەلىسىمدەر جاساسقان. سونىمەن قاتار GEORARK ARAL قوعامدىق قورىمەن مەموراندۋمعا جانە «Kazakh Tourism» اق جانە «BSL consulting» جشس-مەن ۇشجاقتى ىنتىماقتاستىق كەلىسىمىنە قول قويىلعان. «بايتەرەك» بىرلەسكەن كاسىپورنى زىمىران-عارىش كەشەنىنىڭ نەگىزگى نىساندارىن قامتيتىن ەكسكۋرسيالىق باعدارلامالاردى بەكىتتى.
2018 جىلى «بايتەرەك» عارىش-زىمىران كەشەنىن قۇرۋ جوباسىن جۇزەگە اسىرۋ ماقساتىندا «زەنيت-م» كەشەنىنىڭ نىساندارى رەسەي فەدەراتسياسىنىڭ جالداۋىنان شىعارىلىپ، قازاقستاندىق تاراپقا قايتارىلدى. سودان بەرى بۇل كەشەننىڭ جۇمىسقا جارامدىلىعىن جانە ماقساتقا ساي پايدالانۋعا دايىندىعىن قامتاماسىز ەتۋ ءۇشىن ول 010 بيۋدجەتتىك باعدارلاماسى شەڭبەرىندە («عارىش ينفراقۇرىلىمىن ساقتاۋ جانە ونى پايدالانۋدى كەڭەيتۋ») قارجىلاندىرىلىپ كەلەدى. 2025 جىلعا ارنالعان رەسپۋبليكالىق بيۋدجەتتى ناقتىلاۋ اياسىندا كەشەننىڭ جەرۇستى عارىش ينفراقۇرىلىمىن ۇستاۋ جانە پايدالانۋ بويىنشا مەملەكەتتىك تاپسىرمانى ورىنداۋعا 937,6 ملن تەڭگە ءبولىندى. قوسىمشا 590 ملن تەڭگە ءبولۋ جانە 155 ينجەنەردى جۇمىسقا الۋ ماسەلەسى دە قاراستىرىلىپ جاتىر.
پرەمەردىڭ مالىمەتىنشە، قازىرگى ۋاقىتتا ۋاكىلەتتى ورگاندار «بايقوڭىر» كەشەنىندەگى 69 اۆتوكولىك قۇرالىن جالدان شىعارۋ ماسەلەسىن پىسىقتاپ جاتىر. بۇل كولىك قۇرالدارى قولدانىستاعى زاڭناماعا سايكەس تىركەلەتىن بولادى.
«بۇگىندە «عارىشتىق تەحنيكا جانە تەحنولوگيالار»، «اەروعارىشتىق ينجەنەريا» ءبىلىم بەرۋ باعدارلامالارى بويىنشا (باكالاۆريات، ماگيستراتۋرا، PhD) مامانداردى دايىنداۋ كەلەسى جوعارى وقۋ ورىندارىندا جۇزەگە اسىرىلىپ جاتىر: ءال-فارابي اتىنداعى قازاق ۇلتتىق ۋنيۆەرسيتەتى، ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى، گ. داۋكەەۆ اتىنداعى الماتى ەنەرگەتيكا جانە بايلانىس ۋنيۆەرسيتەتى، ق.ي. ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتى. سونىمەن قاتار كادرلار «بولاشاق» حالىقارالىق ستيپەندياسى اياسىندا جانە بايقوڭىر قالاسىنداعى ماسكەۋ اۆياتسيا ينستيتۋتىنىڭ «ۆوسحود» فيليالىندا دايىندالادى»، – دەدى ۇكىمەت باسشىسى.
قازاقستاندىق عارىشكەرلەر قاتىساتىن حالىقارالىق عارىشتىق باعدارلامالارعا كەلسەك، پرەمەر-مينيستر مۇنداي جوبالار ۇلتتىق جانە حالىقارالىق قاجەتتىلىك بولعان جاعدايدا عانا جۇزەگە اسىرىلاتىنىن اتاپ ءوتتى.
«پيلوتتى باعدارلامالارعا قاتىسۋ ايتارلىقتاي قارجىلىق شىعىندى تالاپ ەتەدى. بۇل تەك ۇشۋعا عانا ەمەس، عارىشكەردى دايىنداۋعا، عىلىمي باعدارلامالارعا، لوگيستيكاعا جانە ۇشۋدان كەيىنگى قىزمەتتەرگە دە قاتىستى. سوندىقتان ءتورتىنشى قازاقستاندىق عارىشكەردىڭ ۇشۋىن جۇزەگە اسىرۋعا بارىنشا سالماقتى ءارى پراگماتيكالىق تۇرعىدان قاراۋ قاجەت. ەگەر جوبانىڭ وزەكتىلىگى مەن نەگىزدىلىگى راستالسا، ءتيىستى شارالار حالىقارالىق مىندەتتەمەلەر مەن ەلدىڭ قارجىلىق-ەكونوميكالىق مۇمكىندىكتەرىنە ساي جۇزەگە اسىرىلادى»، – دەپ ءتۇسىندىردى بەكتەنوۆ.
