Qazaqstan Premer-ministrı Oljas Bektenov tranzittık-kölık salasyn damytu jönındegı Prezident tapsyrmalarynyŋ oryndaluyn talqylaǧan keŋeste profildı vedomstvolarǧa Äzerbaijan jäne Gruziiamen sifrlyq jüielerdı integrasiialaudy qamtamasyz etudı tapsyrdy. Būl bastama Transkaspii halyqaralyq kölık baǧytyn (Orta dälız) damytuǧa baǧyttalǧan, dep habarlaidy "Adyrna".
Ükımet mälımetınşe, Qazaqstan atalǧan marşrutty strategiialyq baǧyt retınde qarastyrady. Qazırgı uaqytta THKB boiymen jük jetkızu merzımın qysqartu, «Altynköl – Poti/Batumi» baǧyty boiynşa bıryŋǧai tarif engızu, sondai-aq sifrlyq platformalardy özara bırıktıru jūmystary jürgızılıp jatyr.
Sonymen qatar temırjol salasynda jalpy ūzyndyǧy 3,9 myŋ şaqyrymdy qūraityn ırı infraqūrylymdyq jobalar ıske asyryluda.
Keŋeste teŋız tasymalyn damytu mäselelerı de qaraldy. Atap aitqanda, Aqtau – Baku baǧyty boiynşa jük ainalymyn arttyru, Aqtau jäne Qūryq porttarynyŋ äleuetın küşeitu şaralary talqylandy. Biyl Aqtau portynda 1,3 mln tekşe metr kölemınde tübın tereŋdetu jūmystary jürgızılmek.
Premer-ministr Aqtau – Baku baǧytyna qatynaityn alty konteinerlık kemenı satyp alu räsımderınıŋ sozylyp ketkenıne nazar audaryp, jaŋa kemelerdı ıske qosu prosesın jedeldetudı tapsyrdy.
Ükımette Orta dälızdı damytu Qazaqstannyŋ tranzittık äleuetın arttyryp, Europa men Aziia arasyndaǧy logistikalyq bailanystardy nyǧaituǧa mümkındık beretını atap ötıldı.
