ۇكىمەت باسشىسى بىرقاتار ءوڭىر اكىمدەرىنىڭ جۇمىسىنا سىن ايتتى، دەپ حابارلايدى "ادىرنا" ۇلتتىق پورتالى.
ۇكىمەت وتىرىسىندا جىلىتۋ ماۋسىمىنا دايىندىق بارىسى قارالدى. ناتيجەسىندە وتىرىستا پرەمەر-مينيستر ولجاس بەكتەنوۆ جىلىتۋ ماۋسىمىنىڭ باستالۋىنا ءبىر ايدان ءسال استام ۋاقىت قالعانىن جانە باسشىلاردىڭ كوپشىلىگى دايىندىق تۋرالى سەنىمدى سويلەۋگە تىرىسسا دا جۇمىستىڭ ناتيجەلى بولاتىنىنا سەندىرمەيتىنىن ايتتى.
پرەمەردىڭ سوزىنشە، «Qarmet» كومپانياسىنىڭ 2-ءشى جەو-سىنداعى 2-ءشى قازاندىقتى جوندەۋ جۇمىستارى مەرزىمىندە اياقتالماعان. ونىڭ ۇستىنە 1-ءشى قازاندىقتى كۇردەلى جوندەۋ سول كۇيى باستالماعان. ال №7 قازاندىقتى جوندەۋ جۇمىستارى دا بەكىتىلگەن كەستەدەن كەشىگىپ جاتىر.
ء"بىزدىڭ وتىرىستارىمىز بەن كەڭەستەرىمىزدە وبلىس اكىمدەرىنە وسىنداي وسال تۇستارعا نازار اۋدارۋ تۋرالى بىرنەشە رەت ايتىلدى. سونىمەن قاتار جوندەۋ ناۋقانى كەزىندە تاۋەكەل تۋدىرۋى مۇمكىن ناقتى جاعدايلاردى اتاپ كورسەتىپ، شۇعىل شارالار قابىلداۋ قاجەتتىگى تۋرالى تاپسىرمالار دا بەرىلدى. الايدا، 3 اي ءوتتى، باياعى جارتاس – سول جارتاس، وزگەرىس شامالى. سول وڭىرلەر ءالى ارتتا، سول باياعى كەشىكتىرۋ، كەيىنگە شەگەرۋ. ەنەرگەتيكا مينيسترلىگى كاسىپورىندارعا جىلىتۋ كەزەڭىنە ازىرلىك پاسپورتتارىن بەرە باستادى. جىلۋ ورتالىقتارىڭ ازىرلىك پاسپورتىن بەرۋدەن باس تارتىلعان جاعدايدا سول وڭىرلەردە اكىمدەردىڭ جەتەكشىلىك ەتەتىن ورىنباسارلارىنىڭ تىكەلەي جاۋاپكەرشىلىگى قارالاتىن بولادى", — دەپ اتاپ ءوتتى ولجاس بەكتەنوۆ.
ودان بولەك، ولجاس بەكتەنوۆ كومىر مەن مازۋت جەتكىزۋ ماسەلەلەرىن قاتاڭ باقىلاۋدا ۇستاۋدى تاپسىردى.
ۇكىمەت وتىرىسىندا پرەمەر-مينيستر جاۋاپتى مينيسترلەر مەن وبلىس اكىمدەرىنىڭ نازارىن ستانسالاردى وتىن قورىمەن قامتاماسىز ەتۋگە اۋداردى. كونكۋرستىق راسىمدەردىڭ كەش وتكىزىلۋىنە بايلانىستى سۇراقتار تۋىنداپ وتىرعانى باسا ايتىلدى.
