ولجاس بەكتەنوۆ سۋ تاسقىنى قاۋپىنە بايلانىستى رەسپۋبليكالىق كەڭەس وتكىزدى، دەپ حابارلايدى “ادىرنا” ۇلتتىق پورتالى.
پرەمەر-مينيستر ولجاس بەكتەنوۆ سولتۇستىك قازاقستان وبلىسىنا جۇمىس ساپارى بارىسىندا سۋ تاسقىنى كەزەڭىنە دايىندىق ماسەلەلەرى بويىنشا رەسپۋبليكالىق كەڭەس وتكىزدى. كەڭەسكە ەكولوگيا جانە تابيعي رەسۋرستار ءمينيسترى ەرلان نىسانباەۆ، سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ، توتەنشە جاعدايلار ءمينيسترى شىڭعىس ءارىنوۆ، سونداي-اق بىرقاتار وبلىس اكىمدەرى قاتىستى. جيىندا بيىلعى كوكتەمدە سۋ تاسقىنى قاۋپىنىڭ جوعارى ەكەنى ايتىلىپ، وعان دايىندىق شارالارى تالقىلاندى.
“قازگيدرومەت” رمك-نىڭ الدىن الا بولجامىنا سايكەس، اقپان ايىندا اۋا رايىنىڭ جىلى بولۋىنا بايلانىستى مۇز قاتۋ قاۋپى بار. ال ناۋرىزدا جاۋىن-شاشىن مولشەرىنىڭ ارتۋى جانە تەمپەراتۋرانىڭ جوعارىلاۋى سۋ تاسقىنى قاۋپىن كۇشەيتەدى.
ەكولوگيا جانە سۋ رەسۋرستارى مينيسترلىگىنىڭ دەرەكتەرى بويىنشا، ىلعال مولشەرى سولتۇستىك قازاقستان، اقمولا، پاۆلودار، قاراعاندى، شىعىس قازاقستان، ۇلىتاۋ، اباي، جەتىسۋ، اقتوبە، اتىراۋ جانە ماڭعىستاۋ وبلىستارىنىڭ باتىس بولىكتەرىندە، سونداي-اق الماتى، تۇركىستان، جامبىل وبلىستارىنىڭ تاۋ بوكتەرىندە نورمادان جوعارى.
"قازىر سۋ تاسقىنى كەزەڭىنە ساقاداي-سايمىز دەپ ايتۋعا ءالى ەرتە. وسى كۇنگە دەيىن ءتيىستى شەشىمدەر قابىلدانباعان بىرقاتار ماسەلە بار. بۇل اسىرەسە سۋ باسۋ قاۋپى جوعارى ايماقتارعا قاتىستى. قازىر، ەڭ الدىمەن، ەلدى مەكەندەردىڭ سۋ تاسقىنىنا ناقتى دايىندىق دەڭگەيىن تەكسەرۋ كەرەك. ءاربىر ەلدى مەكەنگە بارىپ، قالىپتاسقان جاعدايدى جان-جاقتى سارالاپ، ءتيىستى شارالار قابىلدايتىن وڭىرلىك كوميسسيالار قۇرۋدى تاپسىرامىن. بارلىق اكىم تىكەلەي جاۋاپ بەرەدى. سوندىقتان جۇمىستى جانداندىرىپ، سۋ تاسقىنىنا قارسى بەلگىلەنگەن شارالاردى ناقتى ىسكە اسىرۋ قاجەت", - دەدى ولجاس بەكتەنوۆ.
توتەنشە جاعدايلار ءمينيسترى شىڭعىس ءارىنوۆتىڭ ايتۋىنشا، بۇگىندە سۋ تاسقىنى قاۋپى بار ايماقتا 1 223 ەلدى مەكەن ورنالاسقان.
پرەمەر-مينيستر جاعدايدىڭ كۇردەلىلىگىن اتاپ ءوتىپ، بارلىق جاۋاپتى ورگاندارعا تاسقىننىڭ الدىن الۋ ءۇشىن ءتيىستى شارالاردى كۇشەيتۋدى تاپسىردى.
