ۇكىمەت وتىرىسىندا پرەمەر-مينيستر ولجاس بەكتەنوۆ اۋىل شارۋاشىلىعى مينيسترلىگىنە ءبىر اپتا ىشىندە مال شارۋاشىلىعىن دامىتۋ جانە ەت ءوندىرىسى مەن ەكسپورتى كولەمىن ارتتىرۋ بويىنشا ناقتى ۇسىنىستار ەنگىزۋدى تاپسىردى، دەپ حابارلايدى "ادىرنا" ۇلتتىق پورتالى.
ولجاس بەكتەنوۆتىڭ سوزىنشە، مەملەكەت باسشىسى ەگىن شارۋاشىلىعىنداعى وڭ ناتيجەلەردى اتاپ ءوتىپ، مال شارۋاشىلىعى سالاسىنداعى جۇمىستاردى جانداندىرۋدى مىندەتتەگەن.
"مەملەكەت باسشىسى ەگىن شارۋاشىلىعىنداعى وڭ ناتيجەلەردى اتاپ ءوتىپ، مال شارۋاشىلىعى سالاسىنداعى جۇمىستاردى جانداندىرۋدى تاپسىردى. وسىعان وراي اۋىل شارۋاشىلىعى مينيسترلىگى ءبىر اپتا ىشىندە ەت ءوندىرىسى مەن ەكسپورتى كولەمىن ارتتىرۋ جونىندەگى ناقتى شارالارمەن بىرگە مال شارۋاشىلىعىن ودان ارى دامىتۋ بويىنشا ۇسىنىستار ەنگىزسىن", - دەدى ۇكىمەت وتىرىسى بارىسىندا.
سونىمەن قاتار، پرەمەر مينيسترلىككە «بايتەرەك» حولدينگىمەن بىرلەسىپ، جەڭىلدەتىلگەن نەسيە بەرۋ ءتارتىبىن كەڭەيتۋ ارقىلى اۋىل شارۋاشىلىعىن قولداۋ قۇرالدارىن دامىتۋعا ءتيىس ەكەنىن ايتتى.
"ەگىنشىلەردى تىكەلەي سۋبسيديالاۋدىڭ ورنىنا جەڭىلدەتىلگەن نەسيە بەرۋ تەتىگى ءوزىنىڭ تيىمدىلىگىن كورسەتكەنىن ايتا كەتۋ كەرەك. مينيسترلىك «بايتەرەك» حولدينگىمەن بىرلەسىپ، وسىعان ۇقساس اۋىل شارۋاشىلىعىن قولداۋ قۇرالدارىنىڭ اياسىن كەڭەيتۋدى جالعاستىرۋعا ءتيىس", - دەدى ولجاس بەكتەنوۆ.
ەسكە سالايىق، كەشە مەملەكەت باسشىسى قاسىم-جومارت توقاەۆ «Turkistan» گازەتىنە بەرگەن سۇحباتىندا 2035 جىلعا قاراي الەمدە مال ەتىن تۇتىنۋ كولەمىنىڭ 233 ميلليون تونناعا جەتەتىنىن، ونىڭ يمپورتى 27 ميلليون تونناعا دەيىن وسەتىنىن اتاپ وتكەن ەدى.
