ۇكىمەت وتىرىسىندا ەنەرگەتيكا جانە كوممۋنالدىق ينفراقۇرىلىمدى جاڭعىرتۋ ماسەلەلەرى قارالدى. جوندەۋ جۇمىستارىنا وتىنىمدەردىڭ تومەن دەڭگەيدە بەرىلۋىنە بايلانىستى الماتى وبلىسى «قىزىل ايماققا» ەندى، دەپ حابارلايدى "ادىرنا" ءتىلشىسى.
پرەمەر-مينيستر ولجاس بەكتەنوۆ ءوڭىر اكىمى مارات سۇلتانعازيەۆتەن مۇنىڭ سەبەبىن سۇرادى.
الماتى وبلىسىنىڭ اكىمىنىڭ مالىمەتىنشە، وڭىردە جالپى قۇنى 62,9 ملرد تەڭگەنى قۇرايتىن 10 جوبانى ىسكە اسىرۋ جوسپارلانعان. ونىڭ ىشىندە ءتورت جوبا جەرگىلىكتى بيۋدجەت ەسەبىنەن قارجىلاندىرىلادى. ال قالعان جوبالاردى «الاتاۋ جارىق كومپانياسى» اق جۇزەگە اسىرادى. كونكۋرستىق راسىمدەر 17 شىلدەدە باستالعان.
اكىمنىڭ ايتۋىنشا، جالپى قۇنى 2 ملرد تەڭگەنى قۇرايتىن جىلۋمەن جابدىقتاۋ سالاسىنداعى ەكى جوبا بويىنشا مەردىگەرلەر انىقتالىپ، كەلىسىمشارتتار جاسالعان. جىلۋ جەلىلەرىن قايتا جاڭعىرتۋ جۇمىستارىن قاراشا ايىنىڭ سوڭىنا دەيىن اياقتاۋ كوزدەلىپ وتىر. سونىمەن قاتار سۋمەن جابدىقتاۋ جانە سۋ بۇرۋ جۇيەلەرىنە قاتىستى جالپى قۇنى 2 ملرد تەڭگە بولاتىن تاعى ەكى جوبا بويىنشا پروكۋراتۋرانىڭ ۇسىنىسىنان كەيىن كونكۋرس قورىتىندىلارىنىڭ كۇشى جويىلىپ، راسىمدەر قايتا جاريالانعان. وسىعان بايلانىستى جاۋاپتى تۇلعالار تارتىپتىك جاۋاپكەرشىلىككە تارتىلعان. قايتا وتكىزىلەتىن كونكۋرستىڭ ناتيجەسى 25 تامىزعا دەيىن شىعارىلىپ، جۇمىستاردى جىل سوڭىنا دەيىن اياقتاۋ جوسپارلانعان.
مارات سۇلتانعازيەۆ اتالعان ەكى جوبانىڭ قارجى مينيسترلىگى تاراپىنان قارجىلاندىرۋى ۋاقىتشا توقتاتىلاتىن باسىم ەمەس جوبالار تىزىمىنە ەنگىزىلگەنىن ايتىپ، پرەمەر-مينيستردەن ولاردى وسى تىزىمنەن الىپ تاستاۋدى سۇرادى.
پرەمەر-مينيستر ولجاس بەكتەنوۆ ءوڭىر اكىمىنىڭ بايانداماسىنا سىن ايتتى.
ء«سىزدى تىڭداساق، وزىڭىزدەن باسقانىڭ ءبارى كىنالى. جۇمىستى جەدەلدەتىڭىز»، – دەدى پرەمەر-مينيستر.
