وزبەكستان ۇكىمەتى جاڭا قاۋلى قابىلداپ، ەندى ازاماتتارعا جىنىسىن اۋىستىرۋ نەگىزىندە اتى-ءجونى مەن اكەسىنىڭ اتىن وزگەرتۋگە رۇقسات بەردى. ءتيىستى قۇجات 13 ماۋسىمدا نورماتيۆتىك-قۇقىقتىق اكتىلەر بازاسىندا جاريالانعانىن UzNews.uz جازدى، دەپ حابارلايدى “ادىرنا”.
ەندى اتى-ءجوندى وزگەرتۋگە نەگىز رەتىندە مەديتسينالىق مەكەمە بەرگەن جىنىس اۋىستىرۋ تۋرالى مەديتسينالىق قورىتىندى جارامدى بولىپ سانالادى. بۇل پروتسەدۋرا بۇرىنعىداي احاج ورگاندارى ارقىلى جۇرگىزىلەدى.
باسىلىم جازعانداي، بۇعان دەيىن جەكە دەرەكتەردى وزگەرتۋ تاريحي جانە ۇلتتىق داستۇرلەرگە سايكەس، وزبەكستان رەسپۋبليكاسىنىڭ "مەملەكەتتىك ءتىل تۋرالى" زاڭىنىڭ 15-بابىندا كورسەتىلگەن نورمالار نەگىزىندە جۇزەگە اسىرىلاتىن. مىسالى، ازاماتتار فاميليالارىنداعى "-وۆ", "-ەۆ" سىندى ورىسشا جۇرناقتاردان باس تارتۋ ارقىلى وزگەرىس ەنگىزە الاتىن. ماسەلەن، جۋرناليستيكا جانە بۇقارالىق كوممۋنيكاتسيالار ۋنيۆەرسيتەتىنىڭ رەكتورى شەرزودحون قۇدراتحودجا بىرنەشە جىل بۇرىن رەسمي تۇردە قۇدراتحودجاەۆ دەگەن فاميليادان باس تارتقان.
جاڭا زاڭ رەداكتسياسىنا سايكەس، اتى-ءجوندى كەلەسى جاعدايلاردا دا وزگەرتۋگە رۇقسات بەرىلەدى:
- ەگەر جۇبايى نەكەدەگى نەمەسە اجىراسقاننان كەيىنگى كەزەڭدە قىز كەزىندەگى فاميلياسىن قايتارعىسى كەلسە;
- وتباسى مۇشەلەرى ءبىر فاميليامەن بولعىسى كەلسە;
- اتا-انالار بالالارىنىڭ اكەسىمەن نەمەسە اناسىمەن، اناسىنىڭ قىز كەزىندەگى تەگىمەن، وگەي اكە نەمەسە قامقورشىنىڭ فاميلياسى بويىنشا بولۋىن قالاسا;
- 16 جاسقا تولعان ادامعا اكەلىك تانۋ ءراسىمى جۇرگىزىلگەن جاعدايدا;
- جىنىسىن اۋىستىرعان جاعدايدا.
وزبەك پارلامەنتىنىڭ بۇرىنعى دەپۋتاتى، قازىرگى ۋاقىتتا رەسپۋبليكا ەكولوگيا ءمينيسترىنىڭ كەڭەسشىسى راسۋل كۋشەرباەۆ بۇل وزگەرىستەرگە قاتىستى الەۋمەتتىك جەلىدەگى جازباسىندا: «مىسالى، ەندى جىنىسىن اۋىستىرعان ازامات ديلشود ەش كەدەرگىسىز ەسىمىن ايەل نۇسقاسىنا – ديلشودا ەتىپ وزگەرتە الادى»، – دەپ اتاپ ءوتتى.
