اتىراۋ قالاسىندا جاستار مەن شىعارماشىل قاۋىمعا ارنالعان ATYRAU CREATIVE HUB ءوز جۇمىسىن باستادى. ورتالىقتىڭ اشىلۋىنا وراي اتىراۋ وبلىسىنىڭ اكىمى سەرىك شاپكەنوۆ حابقا ارنايى بارىپ، ونىڭ جۇمىسىمەن تانىستى.
جاڭا ورتالىق وڭىردەگى كرەاتيۆ يندۋستريانى دامىتۋعا، جاس تالانتتاردىڭ الەۋەتىن ارتتىرۋعا جانە زاماناۋي يدەيالاردى جۇزەگە اسىرۋعا باعىتتالعان.
حاب وكىلى داۋرەن سەيىتقاليەۆتىڭ ايتۋىنشا، مۇندا مەديا، ديزاين، ءىت جانە كاسىپكەرلىك باعىتتارى بويىنشا جۇمىستار جۇرگىزىلەدى. قاتىسۋشىلار ءوز جوبالارىن ۇسىنىپ، كاسىبي مامانداردان كەڭەس الىپ، ءتۇرلى شەبەرلىك ساعاتتارى مەن وقىتۋ ترەنينگتەرىنە قاتىسا الادى.
ەركىن فورماتتا وتكەن كەزدەسۋدە قازاقستان رەسپۋبليكاسى مادەنيەت جانە اقپارات مينيسترلىگى كرەاتيۆتى يندۋستريالار دەپارتامەنتىنىڭ ديرەكتورى ايگەرىم جونكينا بۇل باستاما مەملەكەت باسشىسىنىڭ تاپسىرماسىنا سايكەس جۇزەگە اسىرىلىپ جاتقانىن اتاپ ءوتتى. ونىڭ ايتۋىنشا، بۇگىندە ەلىمىزدىڭ 20 وڭىرىندە وسىنداي كرەاتيۆ حابتار اشىلىپ، جۇمىسىن باستاپ ۇلگەرگەن. ەندى بۇل قاتارعا اتىراۋ قالاسى دا قوسىلىپ وتىر.
مامانداردىڭ پىكىرىنشە، كرەاتيۆ حاب شىعارماشىل جاستاردىڭ جوبالارىن دامىتۋعا، ولاردى كوممەرتسيالاندىرۋعا جانە كەڭ اۋديتورياعا تانىتۋعا مۇمكىندىك بەرەدى. سونىمەن قاتار، بۇل الاڭ ستارتاپ باستامالاردى قولداۋعا جانە جاڭا يدەيالاردىڭ ىسكە اسۋىنا جول اشادى.
جاڭا ورتالىق جاستاردىڭ بەلسەندىلىگىن ارتتىرىپ، ءوڭىردىڭ شىعارماشىلىق جانە كاسىپكەرلىك الەۋەتىن دامىتۋعا سەرپىن بەرەدى دەپ كۇتىلۋدە.
