جاسوسپىرىمدەر اراسىنداعى كۇيزەلىس ماسەلەسى بۇگىنگى قوعامدا وزەكتى تاقىرىپتاردىڭ بىرىنە اينالدى. پسيحولوگيالىق قىسىم، الەۋمەتتىك ورتا، وتباسىنداعى تۇسىنىسپەۋشىلىك - مۇنىڭ ءبارى بالانىڭ ىشكى الەمىنە اسەر ەتەدى. پسيحولوگ ۇلمەكەن ساندىبەكقىزىنىڭ ايتۋىنشا، بۇل ماسەلەنى دەر كەزىندە بايقاپ، دۇرىس قولداۋ كورسەتۋ – ەڭ ماڭىزدى قادام. "ادىرنا" ءتىلشىسى ماتەريالدا تارقاتادى.
كۇيزەلىستىڭ باستى سەبەپتەرى قانداي؟
ماماننىڭ سوزىنشە، جاسوسپىرىمدەردىڭ پسيحولوگيالىق كۇيىنە بىرنەشە فاكتور اسەر ەتەدى. سونىڭ ىشىندە اتا-انامەن قارىم-قاتىناس، بۋللينگ، الەۋمەتتىك جەلىلەردەگى قىسىم ەرەكشە ورىن الادى.
«كوپ جاعدايدا بالا ءوز ويىن اشىق جەتكىزە المايدى. ىشكى كۇيزەلىستى جاسىرىپ، جالعىز ءوزى كۇرەسۋگە تىرىسادى. ال بۇل جاعداي ۋاقىت وتە كەلە اۋىر سالدارعا اكەلۋى مۇمكىن»، – دەيدى پسيحولوگ.
بەلگىلەرىن قالاي بايقاۋعا بولادى؟
ۇلمەكەن ساندىبەكقىزى اتا-انالارعا بالانىڭ مىنەز-قۇلقىنداعى وزگەرىستەرگە مۇقيات بولۋعا كەڭەس بەرەدى. سەبەبى كۇيزەلىستىڭ العاشقى بەلگىلەرى كوبىنە ەلەۋسىز قالادى.
ونىڭ ايتۋىنشا، نازار اۋدارۋ قاجەت بەلگىلەر:
- تۇيىقتالۋ، جالعىز قالۋعا ۇمتىلۋ
- بۇرىن ۇناتقان نارسەلەرگە قىزىعۋشىلىقتىڭ جوعالۋى
- ۇيقى مەن تابەتتىڭ وزگەرۋى
- اشۋلانشاقتىق نەمەسە نەمقۇرايلىلىق
«بۇل – جاي عانا وتپەلى كەزەڭ دەپ قاراۋعا بولمايتىن سيگنالدار»، – دەيدى مامان.
اتا-انانىڭ ءرولى قانداي؟
پسيحولوگ ەڭ الدىمەن اتا-انانىڭ قولداۋى ماڭىزدى ەكەنىن ايتادى. بالامەن اشىق سويلەسۋ، ونى تىڭداۋ جانە تۇسىنۋگە تىرىسۋ – باستى مىندەت.
«بالاعا اقىل ايتۋ ەمەس، ونى تىڭداۋ ماڭىزدى. ول ءوزىن قاۋىپسىز سەزىنۋى كەرەك. ەگەر بالا اتا-اناسىنا سەنسە، كەز كەلگەن قيىندىقتى بىرگە جەڭۋگە بولادى»، – دەيدى ۇلمەكەن ساندىبەكقىزى.
قالاي كومەكتەسۋگە بولادى؟
ماماننىڭ پىكىرىنشە، ەڭ باستىسى – ۋاقىتىلى ارەكەت ەتۋ. ەگەر بالادا اۋىر كۇيزەلىس بەلگىلەرى بايقالسا، پسيحولوگتىڭ كومەگىنە جۇگىنۋدەن قورىقپاۋ كەرەك.
سونداي-اق:
- بالانىڭ ەموتسياسىن جوققا شىعارماۋ
- قولداۋ كورسەتۋ جانە جىلى قارىم-قاتىناس ورناتۋ
- الەۋمەتتىك قىسىمدى ازايتۋ
- قاجەت بولعان جاعدايدا مامان كومەگىنە جۇگىنۋ
«سۋيتسيد – ماسەلەنىڭ شەشىمى ەمەس. ءار بالاعا تۇسىنىستىك پەن قولداۋ كەرەك»، – دەپ تۇيىندەدى پسيحولوگ.
