ميۋنحگاۋزەن سيندرومى تۋرالى بۇرىن سوڭدى ەستىدىڭىز بە؟ بۇل سيندروممەن اۋىراتىن ادامدار ءسىزدىڭ جانىڭىزدا دا بولۋى مۇمكىن. سەبەبى سيندروم بەلگىلەرى: مۇسىركەۋدى ۇناتاتىن، اياۋشىلىق سەزىمىنە ءزارۋ، ءوزىنىڭ ماسەلەلەرىن ايتىپ، ۇنەمى جالىنىشتى كۇيدە جۇرەتىن ادام.
ميۋنحگاۋزەن سيندرومىنا شالدىققان جاندار وزدەرىن شەكتەن تىس اۋرۋ قىپ كورسەتىپ، ءسىزدىڭ اياۋشىلىق كوزقاراسىڭىزدى وياتۋعا تىرىسادى. بۇل وتە كۇردەلى، ءارى قاۋىپتى پسيحولوگيالىق سيندروم.
ادام كوڭىلىن ءوز ماسەلەلەرىن ايتىپ، شاعىمدانۋ ارقىلى اۋلاۋ مەن ءوزى ويدان شىعارعان اۋرۋ بەلگىلەرىنە ەم ىزدەگەن ادامنىڭ كەيپىن جاساپ، بارلىق ادامنان قامقورلىق كۇتەدى. ءوز وتىرىگىنە ءوزى الدانىپ قالعان. سىرت كوزگە ولاي كورىنبەۋى مۇمكىن، ويتكەنى ولار بىلدىرتپەيدى.
قازاقتا «ادامنىڭ ءىشى باۋىرىنا كىرۋ» دەگەن اتالى ءسوز بار. ءدال وسى ميۋنحگاۋزەن سيندرومىمەن اۋىراتىن ادامدارعا ايتىلعانداي.
«ميۋنحگاۋزەن سيندرومى» تەرمينىن 1951 جىلى اعىلشىن ەندوكرينولوگى ريچارد اشەر ەنگىزگەن بولاتىن. Lancet جۋرنالىندا اۋرۋعا بەيىم ناۋقاستاردىڭ مىنەز-قۇلقىن سيپاتتاعان.
ريچارد اشەر سيدرومنىڭ 3 ءتيپىن انىقتاعان. سونىڭ ەڭ قاۋىپتىسى دەلەگاتسيالىق ءتيپى. ەڭ سوراقىسى، زيانى وزىنە ەمەس، ءوز قامقورلىعىنداعى كىشكەنتاي بالاعا نەمەسە ەرەسەك ادامعا تيەدى. جانۇياسىنداعى ءبىر جاندى اۋرۋ ەتىپ كورسەتىپ، ءوزىن سونىڭ قامقورشىسى، كومەكشىسى رەتىندە تانىستىرىپ، ساۋ ادامدى ءتۇرلى وتىرىك دياگنوزدارمەن اۋرۋ ەتەدى.
ءدال وسى دەلەگاتسيالىق ءتيپى تۋرالى «The Act» (پريتۆورستۆو) ميني سەريالى ناقتى وقيعاعا نەگىزدەلىپ تۇسىرىلگەن. 2019 جىلى 20 ناۋرىزىندا كورەرمەنگە جول تارتتى. بۇل ميني سەريال نەسىمەن ەرەكشە؟
بولعان وقيعا ىزىمەن تۇسىرىلگەن دي دي بلانشار مەن دجيپسي اتتى بويجەتكەننىڭ تالانعا تۇسكەن تاعدىرىن سۋرەتتەيدى. دجيپسي بلانشار كومەككە ءزارۋ، مۇمكىندىگى شەكتەۋلى جانداردىڭ قاتارىندا. اناسىنىڭ ايتۋىنشا، ەپيلەپسيا، اللەرگيا، ءتىپتى مي اۋىتقۋىنا دا شالدىققان.
وقيعا 2008 جىلدان باستالادى. بلانشار وتباسى قايىرىمدىلىق قورى تارتۋ ەتكەن جاڭا ۇيگە كوشىپ كەلەدى.
جاڭا كورشىلەرى بۇل جانۇيانى كوگىلدىر ەكراننان بىرنەشە رەت تاماشالاعان. قىزى مەن اناسى قايىرىمدىلىق شارالارىندا ءان ايتىپ، جۇرتتتىڭ جۇرەگىن ەلجىرەتكەن. ءدجيپسيدىڭ اكەسى اناسىنىڭ ايتۋىنشا، قيىن كەزدە تاستاپ كەتكەن. ديدي دجيپسي قىزىنىڭ ءارى قۇربىسى، اناسى، جاناشىرى، قامقورشىسى. اي سايىن ءتۇرلى قايىرىمدىلىق قورلارىنىن، مەيىرىمدى ادامداردان قاراجات كەلىپ تۇسەدى.
ارباعا تانىلعان قىزدىڭ شاشىن اناسى ءوزى قيىپ، تىستەرىن سۋىرادى. ەڭ قىزىعى، قىز ءوزىنىڭ جۇرە الاتىندىعىن كەيىن بايقايدى. جاسى 18-گە كەلگەن بويجەتكەننىڭ تولقۇجاتىن جىل بويى وزگەرتىپ وتىرعان. ساناسى جەتى جاستا قالىپ قويعانىن العا تارتىپ، قىزىن ءمۇساپىر رەتىندە كورسەتكەندى ۇناتقان.
ءتاتتى اللەرگياڭ بار دەپ ءتىپتى گازدى سۋسىندار مەن ءتاتتى توقاشتاردى دا جەگىزبەدى. كۇنىنە قابىلدايتىن ءتۇرلى ءدارى-دارمەكتەرى مەن ەكپەسى بار. جاڭا ۇيگە كوشىپ كەلگەننەن كەيىن، دجيپسي وزىنە قۇربى تابادى. وزىمەن جاستى ەكەنىن ىشتەي سەزسە دە، اناسىنا دەگەن سەنىمى جوعارى بولدى. قۇربىسىنىڭ جىگىتى بار. قىزىعىپ، الەۋمەتتىك جەلىلەرگە تىركەلەدى. العاشقى ءسۇيىستىڭ نە ەكەنىن كورىپ، ىشكى گارموندارى وزگەرە باستايدى.
جەكە قۇپيالارى پايدا بولادى. تۇندە ءوز اياعىمەن ءجۇرىپ، رۇقسات ەتىلمەگەن سۋسىنداردى ءىشىپ، تاڭەرتەڭ تۇك بولماعانداي ارباعا تاڭىلادى. كۇندىز كوڭىلگە ءزارۋ، اياۋشىلىق سەزىمىن وياتاتىن قىز بولسا، تۇندە ونىڭ ءوز قۇپيا ءومىرى بار ەدى. جەكە نوۋتبۋك ساتىپ الىپ، تانىستىق سايتتارىنا تىركەلىپ، سۇيىكتىسىن تابادى. بەينەبايلانىس ارقىلى سويلەسىپ، كەيىن كەزدەسۋگە بەل بايلايدى.
جاڭا جىل قارساڭىندا اناسىمەن فيلم كورۋگە بارادى. جىگىتى دە كەلەدى. الايدا اناسى ولاردىڭ تىلدەسۋىنە قارسى بوپ، زالدان شىعىپ كەتەدى. كەيىن دجيپسي قاتتى اشۋلانىپ، ديديدەن قۇتىلۋدىڭ امالىن ويلاستىرادى. وكىنىشكە قاراي، ونى ولتىرۋگە شەشىم قابىلدايدى. الەۋمەتتىك جەلىدە تانىسقان جاس جىگىتتىڭ دە پسيحولوگيالىق اۋىتقۋى بار بوپ شىقتى.
2015 جىلدىڭ 14 ماۋسىمىندا ءديديدىڭ فەيسبۋك پاراقشاسىندا جاڭا ۇستاتارلىق جازبا جاريالانادى. «ءديدى ءولى، ءولتىردىم» دەگەن قورقىنىشتى جازبانى كورگەن كورشىلەرى دەرەۋ پوليتسياعا حابارلاپ، ۇيگە كىرەدى. ءديديدىڭ ءمايىتىن كورگەن قۇزىرلى ورگاندار دجيپسيگە ىزدەۋ سالادى. كورشىلەرى ونىڭ مۇگەدەك ەكەنىن، ءوز ەركىمەن ەشقايدا شىعا المايتىنىن العا تارتادى.
اقىرى، دجيپسي ءوز جىگىتىمەن بىرگە تۇتقىندالادى. سوت زالىندا ول بارلىق شىندىقتى ايتىپ، كوزىنە جاس الادى. ءديديدىڭ ونىڭ بار ءومىرىن قۇرتقاندىعىن، اۋرۋ قىپ تاربيەلەگەنى ءۇشىن جازالاعانىن ايتادى.
قورىتا كەلە، ميۋنحگاۋزەن سيندرومىنا شالدىققان ادامدار تەك وزدەرىنىڭ ءومىرىن عانا ەمەس، وزگەلەردىكىندە وزگەرتىپ، قور قىلۋدا. قوعامدى الداۋدا. كىم بىلەدى، ءبىزدىڭ ەلدەدە وسىنداي ولقىلىقتارعا جول بەرىلىپ جاتقان بولار. قاتاڭ تەكسەرىس كەرەك.
ءىنجۋ ومىرزاق
