قازاقستاندا جاڭا كونستيتۋتسيانى قابىلداۋ بويىنشا وتەتىن رەفەرەندۋمعا دايىندىق جۇمىستارى قارقىندى جۇرگىزىلۋدە، دەپ حابارلايدى "ادىرنا" ۇلتتىق پورتالى.
بۇل تۋرالى قر پرەزيدەنتى اكىمشىلىگىنىڭ باسشىسى ايبەك دادەباي مالىمدەدى.
ونىڭ ايتۋىنشا، الداعى رەفەرەندۋم ەلىمىز ءۇشىن دە، بارلىق ازاماتتار ءۇشىن دە اسا ماڭىزدى ساياسي وقيعا سانالادى. وسىعان بايلانىستى بارلىق قۇقىقتىق راسىمدەردىڭ ساقتالۋى مەن زاڭ تالاپتارىنىڭ قاتاڭ ورىندالۋى باستى نازاردا.
«مەملەكەتتىك ورگانداردىڭ نەگىزگى مىندەتى – داۋىس بەرۋ ۇدەرىسىن تولىققاندى ۇيىمداستىرۋ. ياعني، قاجەتتى ينفراقۇرىلىمدى قامتاماسىز ەتۋ، سايلاۋ ۋچاسكەلەرىنىڭ جۇمىسىن ۇيلەستىرۋ، سونداي-اق مۇمكىندىگى شەكتەۋلى ازاماتتارعا قولايلى جاعداي جاساۋ ماڭىزدى»، – دەدى ول.
سونىمەن قاتار، قاسىم-جومارت توقاەۆ جاڭا كونستيتۋتسيا جوباسىن ازىرلەۋگە تىكەلەي قاتىسىپ، ونىڭ مازمۇنىنا ەرەكشە ءمان بەرگەنى اتاپ ءوتىلدى.
ايبەك دادەبايدىڭ سوزىنشە، مەملەكەت باسشىسى ازاماتتاردان، ساراپشىلاردان جانە قوعامدىق ۇيىمداردان تۇسكەن ۇسىنىستاردى جەكە ءوزى قاراپ، تالداعان. سونداي-اق پرەزيدەنت كەڭەسشىلەرمەن جانە جۇمىس توپتارىمەن بىرلەسىپ، كونستيتۋتسيانىڭ كىرىسپەسى مەن نەگىزگى باپتارىن ازىرلەۋگە بەلسەندى اتسالىسقان.
«پرەزيدەنت سوڭعى جارتى جىل ىشىندە پارلامەنتتىك رەفورما جونىندەگى جۇمىس توپتارىمەن جانە كونستيتۋتسيالىق كوميسسيا مۇشەلەرىمەن تۇراقتى تۇردە كەزدەسىپ وتىردى. كەي جاعدايدا بۇل كەزدەسۋلەر ۇزاق ۋاقىتقا سوزىلدى»، – دەدى ول.
بۇدان بولەك، مەملەكەت باسشىسى تىعىز جۇمىس كەستەسىنە قاراماستان، كونستيتۋتسيا ماتىنىمەن تۇنگى ۋاقىتتا دا جۇمىس ىستەگەنى ايتىلدى.
ايبەك دادەباي جاڭا كونستيتۋتسيا جوباسىندا پرەزيدەنتتىڭ ساياسي باعىتى، قوعام مەن مەملەكەتتى دامىتۋعا قاتىستى كوزقاراستارى مەن ۇستانىمدارى كەڭىنەن كورىنىس تاپقانىن جەتكىزدى. ونىڭ پىكىرىنشە، وسىنىڭ ءبارى قاسىم-جومارت توقاەۆ جاڭا كونستيتۋتسيانىڭ باستى اۆتورى ەكەنىن كورسەتەدى.
