مەملەكەتتىك كەڭەسشى ەرلان قارين رەسپۋبليكالىق رەفەرەندۋمدا قابىلدانعان جاڭا كونستيتۋتسيانىڭ 1 شىلدەدەن باستاپ كۇشىنە ەنەتىنىن ايتىپ، بۇل وقيعانى قازاقستاننىڭ دامۋىنداعى جاڭا كەزەڭنىڭ باستاۋى دەپ باعالادى، دەپ حابارلايدى "ادىرنا" ۇلتتىق پورتالى جاس الاشقا سىلتەپ.
جاڭا رەداكتسياداعى اتا زاڭ ەلدەگى ساياسي ينستيتۋتتاردى جاڭعىرتۋعا، قۇقىقتىق جۇيەنى جەتىلدىرۋگە جانە ازاماتتاردىڭ قۇقىقتارى مەن بوستاندىقتارىن قورعاۋدى كۇشەيتۋگە باعىتتالعان. كونستيتۋتسيا كۇشىنە ەنگەننەن كەيىن مەملەكەتتىك باسقارۋدىڭ جاڭا تەتىكتەرى كەزەڭ-كەزەڭىمەن ىسكە قوسىلىپ، بىرقاتار كونستيتۋتسيالىق نورمالار قولدانىسقا ەنگىزىلەدى.
قۇجاتتا مەملەكەتتىك بيلىكتىڭ تيىمدىلىگىن ارتتىرۋعا، زاڭ ۇستەمدىگىن قامتاماسىز ەتۋگە جانە قوعامداعى تۇراقتىلىقتى نىعايتۋعا باسىمدىق بەرىلگەن. سونىمەن قاتار جوعارى لاۋازىمدى تۇلعالاردىڭ وكىلەتتىك مەرزىمىنە قاتىستى جاڭا تالاپتار ەنگىزىلىپ، كونستيتۋتسياعا وزگەرىستەر مەن تولىقتىرۋلار ەنگىزۋدىڭ جالعىز تەتىگى رەتىندە جالپىحالىقتىق رەفەرەندۋم قاعيداتى بەكىتىلگەن.
ەرلان قارين جاڭا كونستيتۋتسيا ۇلتتىق بىرەگەيلىكتى نىعايتۋعا دا ەرەكشە ءمان بەرەتىنىن اتاپ ءوتتى. ونىڭ سوزىنشە، العاش رەت اتا زاڭنىڭ پرەامبۋلاسىندا تاريحي تامىر مەن ۇلى دالانىڭ مۇراسى كورىنىس تاۋىپ، تاريحي-مادەني قۇندىلىقتاردى ساقتاۋ، ءتول مادەنيەتتى قولداۋ، ءداستۇرلى وتباسى ينستيتۋتىن قورعاۋ، ايەلدەر مەن بالالاردىڭ قۇقىقتارىن قامتاماسىز ەتۋ سەكىلدى نورمالار بەكىتىلگەن.
مەملەكەتتىك كەڭەسشى قۇجاتتا عىلىم، ءبىلىم، يننوۆاتسيا جانە ادامي كاپيتالدى دامىتۋ مەملەكەتتىڭ ستراتەگيالىق باسىمدىقتارى رەتىندە ايقىندالعانىن، سونداي-اق تسيفرلىق دەرەكتەردى قورعاۋ مەن زايىرلى مەملەكەت قاعيداتتارىنىڭ دا كۇشەيتىلگەنىن ايتتى.
ونىڭ پىكىرىنشە، كونستيتۋتسياداعى وزگەرىستەردىڭ ماڭىزدىلىعى تەك جاڭا ينستيتۋتتاردىڭ قۇرىلۋىمەن نەمەسە ساياسي رەفورمالارمەن شەكتەلمەيدى. ەڭ باستىسى – قوعامدىق سانانىڭ جاڭعىرۋىنا، زاڭ مەن ءتارتىپ قاعيداتتارىنىڭ ورنىعۋىنا جانە جاۋاپتى ازاماتتىق ۇستانىمداردىڭ قالىپتاسۋىنا ىقپال ەتۋىندە.
ەرلان قارينن جاڭا اتا زاڭ قۇقىقتىق قۇجات قانا ەمەس، سونىمەن قاتار مەملەكەتتىڭ قۇندىلىقتار جۇيەسىن، دامۋ باعىتى مەن ۇلتتىق باسىمدىقتارىن ايقىندايتىن نەگىزگى قۇجات رەتىندە قىزمەت ەتەتىنىن اتاپ ءوتتى.
