2026 جىلعى 13 ناۋرىزدا قاراعاندى قالاسىنداعى «جاستار» سپورت كەشەنىندە حالىقارالىق ۆولونتەرلەر جىلىنا ارنالعان ۆولونتەرلەر فورۋمىنىڭ سالتاناتتى جابىلۋ ءراسىمى ءوتتى. اۋقىمدى شاراعا قاراعاندى وبلىسىنان 6 مىڭعا جۋىق ادام قاتىستى. ولاردىڭ قاتارىندا ۆولونتەرلىك ۇيىمداردىڭ وكىلدەرى، بەلسەندى جاستار، قوعام قايراتكەرلەرى جانە الەۋمەتتىك جوبالاردىڭ باستاماشىلارى بولدى.
فورۋم ەرىكتىلەر قوزعالىسىنىڭ قوعام دامۋىنداعى ءرولىن تالقىلاۋعا، پىكىر الماسۋعا جانە جاڭا يدەيالار ۇسىنۋعا مۇمكىندىك بەرگەن ماڭىزدى ديالوگ الاڭىنا اينالدى.
ءىس-شاراعا قاتىسقان قاراعاندى وبلىسىنىڭ جاستارى اتا زاڭدا كورىنىس تاپقان نەگىزگى قاعيداتتاردى قولدايتىنىن ءبىلدىردى. اتاپ ايتقاندا، ادامي كاپيتالدى دامىتۋ، وتباسى مەن الەۋمەتتىك باستامالاردى قولداۋ، جەكە مەنشىك قۇقىعىن قورعاۋ جانە جاستاردىڭ الەۋەتىن اشۋعا باعىتتالعان يدەيالار جاستار تاراپىنان كەڭ قولداۋ تاپتى.
سونداي-اق سپيكەرلەر جاڭا كونستيتۋتسيادا قوعام ءومىرىنىڭ ماڭىزدى بولىگى رەتىندە ۆولونتەرلىك قىزمەت پەن قايىرىمدىلىقتى دامىتۋعا ەرەكشە ءمان بەردى.
فورۋم قاتىسۋشىلارىنىڭ ايتۋىنشا، بۇگىنگى تاڭدا ۆولونتەرلىك – تەك قايىرىمدىلىق اكتسيالارىنا قاتىسۋ عانا ەمەس. بۇل – ەل تاعدىرىنا جاۋاپكەرشىلىكپەن قارايتىن ازاماتتاردىڭ جاڭا بۋىنى قالىپتاساتىن ازاماتتىق كەمەلدىك مەكتەبى.
سوندىقتان قاراعاندىلىق جاستار الداعى رەفەرەندۋمدى مەملەكەتتىڭ دامۋى جولىنداعى ماڭىزدى قادام رەتىندە قاراستىرادى. شارا قاتىسۋشىلارىنىڭ پىكىرىنشە، ءوز ۇستانىمىن ءبىلدىرىپ، ەلدىڭ اتا زاڭىن قابىلداۋ ۇدەرىسىنە ۇلەس قوسۋ – قازاقستاننىڭ بولاشاعىنا ىقپال ەتۋدىڭ زور مۇمكىندىگى.
سالتاناتتى ءراسىم قازاقستاندىق تانىمال ورىنداۋشىلار ايقىن مەن BAYANSULU قاتىسقان مەرەكەلىك كونتسەرتتىك باعدارلامامەن اياقتالدى.
شارا سوڭىندا ءوڭىردىڭ بەلسەندى جاستارى ازاماتتىق جاۋاپكەرشىلىك تانىتىپ، جالپىحالىقتىق رەفەرەندۋمعا قاتىساتىنىن نىق سەنىممەن ايتتى.
ولاردىڭ ايتۋىنشا، ەل بولاشاعى بۇگىن قالىپتاسادى. سول سەبەپتى ءاربىر داۋىس ماڭىزدى.
