كونستيتۋتسيالىق رەفورما اياسىندا ۇسىنىلعان تۇزەتۋلەر ەلىمىزدى قازىرگى گەوساياسي جانە قۇقىقتىق تاۋەكەلدەردەن قورعاۋعا باعىتتالعان. ءماجىلىس دەپۋتاتى ايدوس سارىمنىڭ پىكىرىنشە، جاڭا كونستيتۋتسيا حالىقتى تاۋەلسىزدىك پەن ەگەمەندىكتى قورعاۋعا مىندەتتەيدى. سول سەبەپتى رەفەرەندۋمعا قوعام مەن ازاماتتاردىڭ قاتىسۋى ونىڭ ەرەكشە قۇندىلىعىن ارتتىرادى.
«كونستيتۋتسيا جوباسىندا ءبىز قوس ازاماتتىعى بار ادامدى قازاقستان ازاماتتىعىنان اۆتوماتتى تۇردە شىعارامىز دەپ جازدىق. ول ۋنيتارلىقتى قامتاماسىز ەتەتىن نورما. ءبىز ءوزىمىزدى رەسپۋبليكا، ۋنيتارلى رەسپۋبليكا دەپ تانيمىز. ياعني، فەدەراتسياعا، كونفەدەراتسياعا، باسقا دا ۇعىمدارعا جول بەرمەيمىز دەگەن ءسوز. مۇنىڭ ءوزى كوپ دۇنيەدەن حابار بەرەدى»، – دەدى ول.
دەپۋتاتتتىڭ ايتۋىنشا، قازاقستاندىقتار جاڭا كونستيتۋتسيا ازىرلەپ قانا قويماي، ەلدىڭ بولاشاعىن قامتاماسىز ەتەتىن ميسسيانى ورىنداعالى وتىر. بۇل پروتسەسس ءاربىر قاتىسۋشى ءۇشىن تاريحي جاۋاپكەرشىلىك، ال قوعام ءۇشىن – ءوز كەلەشەگىن قالىپتاستىرۋعا مۇمكىندىك.
«بۇرىن حالىق – بيلىكتىڭ قاينار كوزى دەپ ايتاتىن ەدىك. بۇدان بىلاي حالىق بيلىكتىڭ قاينار كوزى عانا ەمەس، ەگەمەندىكتىڭ دە تىرەگى، قورعانى دەپ بەلگىلەدىك. بۇل – ۇلكەن جاڭالىق، ماڭىزدى وزگەرىس. ويتكەنى جاۋاپكەرشىلىك تەك بيلىكتە، ارميادا، پارلامەنتتە بولماۋ كەرەك، قازاقستانداعى 21 ملن حالىق تاۋەلسىزدىك پەن ەگەمەندىكتىڭ، مەملەكەتتىك كەپىلى، قورعانى. ءبىز وسىعان كەلە جاتىرمىز جانە سونى قامتاماسىز ەتەمىز، – دەپ اتاپ ءوتتى ايدوس سارىم.
سونىمەن قاتار، ول جاڭا كونستيتۋتسيانىڭ ەلىمىزدىڭ ساياسي جۇيەسىن تۇراقتاندىرۋعا، ازاماتتاردىڭ قۇقىقتارى مەن بوستاندىقتارىن قورعاۋعا، تەحنولوگيالىق جانە الەۋمەتتىك دامۋعا نەگىز بولاتىنىن اتاپ ءوتتى.
«قازىرگى كۇنى ادامنىڭ فيزيكالىق ءومىرى دەگەن ۇعىم بار، ياعني كۇندەلىكتى كوشەدە جۇرەمىز، ۇيدە بولامىز دەگەن سياقتى. بۇل – ناقتى فيزيكالىق ءومىرىمىز. بىراق، قاراپ وتىرساڭىزدار سونىمەن قاتار Digital ءومىر پايدا بولدى. ءبىزدىڭ ءبىلىم الۋىمىز، ءىلىم الۋىمىز، ساۋدا جاساۋىمىز سول ورتاعا ەنىپ جاتىر. ءبىز كوپتەگەن ەلدىڭ الدىن وراپ، كونستيتۋتسيامىزعا تۇڭعىش رەت تسيفرلىق قۇقىق ماسەلەسىن ەنگىزىپ وتىرمىز. وسىنىڭ اياسىندا كوپتەگەن كودەكستىڭ، زاڭداردىڭ وزگەرەتىندىگى انىق. بۇل ۇلكەن جاڭالىق»، – دەدى دەپۋتاتى.
ونىڭ ايتۋىنشا، كونستيتۋتسيا قاعيدات رەتىندە بەكىتىلىپ، بىرنەشە باپقا ناقتى وزگەرىس ەندى. وسىدان كەيىن جاڭا قۇرىلتاي بارلىق كودەكستى، زاڭداردى قايتا جازىپ شىعادى.
ء«بىز ءبىر ءداۋىردى اياقتادىق. ونى پوستكەڭەستىك كەزەڭ دەپ ايتۋعا بولادى. جاڭا، شىن تاۋەلسىز كەزەڭگە اياق باستىق. كونستيتۋتسيانىڭ ۇلكەن ءبىر وزگەرىسى بۇرىن اتا زاڭنىڭ ءبىر بابىندا «بيلىكتىڭ قاينار كوزى – حالىق» دەپ جازىلعان دەگەندى العا تارتاتىنبىز. ەندى ەگەمەندىكتىڭ دە قاينار كوزى مەن قورعانى حالىق دەپ ءبىلىپ، سوعان جۇمىس ىستەيتىن بولامىز. دەمەك، جاۋاپكەرشىلىكتى بولەتىن، تۇتاس حالىققا ورتاق ەتەتىن داۋىرگە كەلدىك، – دەپ تۇيىندەدى ايدوس سارىم.
