قازاقستاندا 2026 جىلعى 23 تامىزدا ەل تاريحىنداعى العاشقى قۇرىلتاي دەپۋتاتتارىنىڭ سايلاۋى وتەدى.
جاڭا وكىلدى ورگاندى قالىپتاستىرۋعا باعىتتالعان ساياسي ناۋقان ازاماتتاردىڭ مەملەكەتتىك باسقارۋ ىسىنە قاتىسۋ مۇمكىندىگىن كەڭەيتۋدى كوزدەيدى.
ورتالىق سايلاۋ كوميسسياسىنىڭ مالىمەتىنشە، سايلاۋعا دايىندىق جۇمىستارى باستالىپ، بارلىق ءىس-شارالار بەكىتىلگەن كۇنتىزبەلىك جوسپارعا سايكەس جۇزەگە اسىرىلادى. قۇجاتتا كانديداتتاردى ۇسىنۋ مەن تىركەۋ ءتارتىبى، سايلاۋالدى ۇگىت جۇرگىزۋ مەرزىمدەرى جانە داۋىس بەرۋ كەزەڭدەرى ناقتى ايقىندالعان.
ورتالىق سايلاۋ كوميسسياسىنىڭ توراعاسى نۇرلان ءابدىروۆتىڭ ايتۋىنشا، سايلاۋدى زاڭ تالاپتارىنا تولىق سايكەس، اشىق، جاريا جانە جوعارى ۇيىمداستىرۋشىلىق دەڭگەيدە وتكىزۋ – باستى مىندەت.
ال وسك توراعاسىنىڭ ورىنباسارى مۇحتار ەرمان قۇرىلتاي دەپۋتاتتارىنىڭ سايلاۋىن ازىرلەۋ مەن وتكىزۋدىڭ كۇنتىزبەلىك جوسپارى بەكىتىلگەنىن مالىمدەدى. ونىڭ ايتۋىنشا، قۇجاتتا پارتيالىق تىزىمدەردى ۇسىنۋ جانە تىركەۋ راسىمدەرى، سونداي-اق سايلاۋ ناۋقانىنىڭ نەگىزگى كەزەڭدەرى بەلگىلەنگەن.
وسك مۇشەسى اسەل ءجانابىلوۆانىڭ سوزىنشە، قۇرىلتاي دەپۋتاتتارىنىڭ العاشقى سايلاۋى جاڭارتىلعان كونستيتۋتسيا مەن سايلاۋ زاڭناماسىنا ەنگىزىلگەن وزگەرىستەر نەگىزىندە وتەدى. بۇل نورمالار ازاماتتاردىڭ كونستيتۋتسيالىق قۇقىقتارىن تولىق ىسكە اسىرۋعا جانە سايلاۋ ۇدەرىسىن جەتىلدىرۋگە باعىتتالعان.
سايلاۋالدى ۇگىت جۇمىستارى 23 شىلدە ساعات 18:00-دە باستالىپ، 22 تامىز ساعات 00:00-دە اياقتالادى. بەلگىلەنگەن مەرزىمنەن تىس ۇگىت جۇرگىزۋگە زاڭمەن تىيىم سالىنعان.
ورتالىق سايلاۋ كوميسسياسى ازاماتتاردى سايلاۋشىلار تىزىمىندەگى جەكە دەرەكتەرىن الدىن الا تەكسەرۋگە شاقىردى. سايلاۋشىلار ءتىزىمى تۇراقتى تىركەلگەن مەكەنجاي بويىنشا جاسالادى. ال باسقا وڭىردە بولاتىن ازاماتتار الدىن الا ەسەپتەن شىعارۋ كۋالىگىن راسىمدەپ، وزگە سايلاۋ ۋچاسكەسىندە داۋىس بەرە الادى. سونىمەن قاتار 7 تامىزدان باستاپ ءاربىر ازامات ءوز سايلاۋ ۋچاسكەسىندە دەرەكتەرىن تەكسەرىپ، قاجەت بولعان جاعدايدا تۇزەتۋ ەنگىزۋگە ءوتىنىش بەرە الادى.
