اقمولا وبلىسىندا «حالىقتىق كونستيتۋتسيا – الەۋمەتتىك-ساياسي پروتسەستەردى جاڭعىرتۋ جانە ەتنوسارالىق كەلىسىم» تاقىرىبىندا دوڭگەلەك ۇستەل ءوتتى. ءىس-شارا اقمولا وبلىسى ىشكى ساياسات باسقارماسى جانىنداعى «قوعامدىق كەلىسىم» كمم الاڭىندا ۇيىمداستىرىلدى.
جيىندى اتالعان مەكەمەنىڭ باسشىسى قۋانىش شاقشاقوۆ اشىپ، جاڭا كونستيتۋتسيانىڭ قوعام ومىرىندەگى ماڭىزىنا توقتالدى. ونىڭ ايتۋىنشا، 2026 جىلعى 1 شىلدەدەن باستاپ كۇشىنە ەنگەن حالىقتىق كونستيتۋتسيا ەلدەگى ساياسي جۇيەنى جاڭعىرتۋعا، مەملەكەتتىك باسقارۋدى جەتىلدىرۋگە جانە ازاماتتىق قوعام ينستيتۋتتارىنىڭ ءرولىن ارتتىرۋعا باعىتتالعان.
باسقوسۋدا كونستيتۋتسيا قاعيدالارىن كەڭىنەن ناسيحاتتاۋ، قۇقىق ۇستەمدىگى مەن الەۋمەتتىك ادىلەتتىلىكتى قامتاماسىز ەتۋ، ازاماتتاردىڭ قۇقىقتارى مەن بوستاندىقتارىن قورعاۋ ماسەلەلەرى تالقىلاندى. سونىمەن قاتار ەتنومادەني بىرلەستىكتەر مەن قوعامدىق ۇيىمداردىڭ الداعى ۋاقىتتا قۇرىلاتىن حالىق كەڭەسى جۇمىسىنا قاتىسۋى، قوعامدىق ىقپالدىڭ زاڭنامالىق باستامالار ارقىلى كۇشەيۋى ءسوز بولدى.
جيىندا اقمولا وبلىسى ىشكى ساياسات باسقارماسىنىڭ وكىلى ەركىن سەيىتوۆ، اقساقالدار كەڭەسىنىڭ مۇشەسى بولات زاكەنوۆ، ««چينسون» كورەي مادەني ورتالىعى» قب توراعاسى جاننا سين، انالار كەڭەسىنىڭ مۇشەسى باقىتجان ايدوسوۆا، ءبىلىم سالاسىنىڭ وكىلى نۇرساۋلە مۇراتقىزى جانە جۋرناليستەر كلۋبىنىڭ مۇشەسى ۆەرونيكا بۋردا بايانداما جاسادى.
«قازىرگى قوعامدىق-ساياسي ۇدەرىستەر كەزەڭىندە بۇقارالىق اقپارات قۇرالدارىنىڭ قوعامدىق كەلىسىمدى نىعايتۋداعى ءرولى ايرىقشا. باق تەك اقپارات تاراتۋشى ەمەس، سونىمەن قاتار قوعامدىق پىكىردى قالىپتاستىرىپ، ديالوگ مادەنيەتىن دامىتاتىن ماڭىزدى ينستيتۋت. جۋرناليستەر زاڭعا قۇرمەت، ءوزارا سىيلاستىق پەن ازاماتتىق جاۋاپكەرشىلىك قۇندىلىقتارىن ناسيحاتتاۋدا شەشۋشى ءرول اتقارادى. ەتنومادەني بىرلەستىكتەردىڭ قىزمەتىن جۇيەلى تۇردە جاريالاۋ، سونداي-اق جاڭارتىلعان كونستيتۋتسيا جاعدايىندا قۇقىقتىق مادەنيەتتى ارتتىرۋ باعىتىنداعى ءتۇسىندىرۋ جۇمىستارىن كۇشەيتۋ – بۇگىنگى كۇننىڭ تالابى», – دەپ اتاپ ءوتتى ۆەرونيكا بۋردا.
سپيكەرلەر كونستيتۋتسيانىڭ جاس ۇرپاق تاربيەسىندەگى رولىنە، وتباسى قۇندىلىقتارىن نىعايتۋعا، ساپالى ءبىلىم مەن اقپاراتتىق قاۋىپسىزدىك ماسەلەلەرىنە ەرەكشە نازار اۋداردى. سونداي-اق قوعامداعى بىرلىك پەن كەلىسىمدى ساقتاۋ، اقپاراتتىق كەڭىستىكتە جاۋاپكەرشىلىكتى ارتتىرۋ قاجەتتىگى ايتىلدى.
جيىن سوڭىندا قاتىسۋشىلار كونستيتۋتسيا قاعيدالارىن حالىق اراسىندا ءتۇسىندىرۋ جۇمىستارىن كۇشەيتۋ، قوعامدىق ينستيتۋتتاردىڭ بەلسەندىلىگىن ارتتىرۋ باعىتىندا بىرلەسكەن ءىس-قيمىلدى جالعاستىرۋعا ۋاعدالاستى.
