ء«ادىل ءسوز» ءسوز بوستاندىعىن قورعاۋ حالىقارالىق قورىنىڭ پرەزيدەنتى قارلىعاش جامانقۇلوۆا قازاقستان رەسپۋبليكاسىنىڭ جاڭا كونستيتۋتسياسىنا ءاربىر ازاماتتىڭ مەملەكەتتىك ورگاندار مەن لاۋازىمدى تۇلعالاردىڭ زاڭسىز ارەكەتتەرىنەن نەمەسە ارەكەتسىزدىگىنەن كەلتىرىلگەن زياندى وتەۋ قۇقىعىن بەكىتۋدى ۇسىندى.
بۇل تۋرالى ول كونستيتۋتسيالىق رەفورما جونىندەگى كوميسسيانىڭ سەگىزىنشى وتىرىسىندا مالىمدەدى.
قارلىعاش جامانقۇلوۆا ءسوز باسىندا كوميسسيا مۇشەلەرىنە اشىقتىق پەن سىندارلى پىكىرتالاس ءۇشىن العىس ءبىلدىرىپ، ازاماتتىق قوعام ۇسىنىستارىن ناقتى قۇقىقتىق تۇجىرىمدارعا اينالدىرعان زاڭگەرلەردىڭ ەڭبەگىن اتاپ ءوتتى.
ونىڭ ايتۋىنشا، مەملەكەتتىك ورگانداردىڭ قابىلدايتىن شەشىمدەرى – رۇقساتتار، تىيىمدار مەن تەكسەرۋلەر – ازاماتتاردىڭ جۇمىس ىستەۋىنە، ءبىلىم الۋىنا، ەمدەلۋىنە جانە مۇلكىن قورعاۋىنا تىكەلەي اسەر ەتەدى. وسى تۇرعىدا زاڭسىز ارەكەتتەردەن كەلگەن زياندى وتەۋ قۇقىعى قۇقىقتىق مەملەكەتتىڭ نەگىزگى كەپىلدىكتەرىنىڭ ءبىرى بولۋى ءتيىس.
«ەگەر ازاماتقا ادىلەتسىزدىك جاسالسا، ول جۇمساعان ۋاقىتى، قارجىسى نەمەسە ءتىپتى مورالدىق زالالى ءۇشىن وتەماقى الۋعا قۇقىلى»، – دەدى ول.
قارلىعاش جامانقۇلوۆانىڭ پىكىرىنشە، مۇنداي نورما ازاماتتاردىڭ قۇقىقتارىن قورعاپ قانا قويماي، مەملەكەتتىك ورگاندار مەن لاۋازىمدى تۇلعالاردىڭ زاڭسىز شەشىم قابىلداۋ تاۋەكەلىن ازايتىپ، الدىن الۋ اسەرىن قالىپتاستىرادى.
ول سوت مەملەكەتتىك ورگاننىڭ نەمەسە لاۋازىمدى تۇلعانىڭ شەشىمىن زاڭسىز دەپ تانىعان جاعدايدا، ازاماتتارعا كەلتىرىلگەن زياندى وتەۋ مۇمكىندىگىنە كونستيتۋتسيالىق كەپىلدىك بەرىلۋى قاجەت ەكەنىن اتاپ ءوتتى.
«جاڭا كونستيتۋتسيا ءاربىر ادامنىڭ قۇقىقتار مەن مىندەتتەردىڭ يەسى ەكەنىن جانە ولاردى مەملەكەتتەن قورعاۋدى ءوز بەتىنشە تالاپ ەتۋگە قۇقىلى ەكەنىن ايقىنداۋى ءتيىس»، – دەدى ول.
قورىتىندىلاي كەلە، قارلىعاش جامانقۇلوۆا بۇل نورمانى ەنگىزۋ ءار ازاماتتى جاريا-قۇقىقتىق قاتىناستاردىڭ تەڭ قۇقىلى قاتىسۋشىسىنا اينالدىرىپ، «زاڭ جانە ءتارتىپ» قاعيداتىن ىسكە اسىرۋدىڭ ناقتى قۇرالى بولاتىنىن ايتتى.
