«Ädıl söz» söz bostandyǧyn qorǧau halyqaralyq qorynyŋ prezidentı Qarlyǧaş Jamanqūlova Qazaqstan Respublikasynyŋ jaŋa Konstitusiiasyna ärbır azamattyŋ memlekettık organdar men lauazymdy tūlǧalardyŋ zaŋsyz äreketterınen nemese äreketsızdıgınen keltırılgen ziiandy öteu qūqyǧyn bekıtudı ūsyndy.
Būl turaly ol Konstitusiialyq reforma jönındegı komissiianyŋ segızınşı otyrysynda mälımdedı.
Qarlyǧaş Jamanqūlova söz basynda komissiia müşelerıne aşyqtyq pen syndarly pıkırtalas üşın alǧys bıldırıp, azamattyq qoǧam ūsynystaryn naqty qūqyqtyq tūjyrymdarǧa ainaldyrǧan zaŋgerlerdıŋ eŋbegın atap öttı.
Onyŋ aituynşa, memlekettık organdardyŋ qabyldaityn şeşımderı – rūqsattar, tyiymdar men tekseruler – azamattardyŋ jūmys ısteuıne, bılım aluyna, emdeluıne jäne mülkın qorǧauyna tıkelei äser etedı. Osy tūrǧyda zaŋsyz äreketterden kelgen ziiandy öteu qūqyǧy qūqyqtyq memlekettıŋ negızgı kepıldıkterınıŋ bırı boluy tiıs.
«Eger azamatqa ädıletsızdık jasalsa, ol jūmsaǧan uaqyty, qarjysy nemese tıptı moraldyq zalaly üşın ötemaqy aluǧa qūqyly», – dedı ol.
Qarlyǧaş Jamanqūlovanyŋ pıkırınşe, mūndai norma azamattardyŋ qūqyqtaryn qorǧap qana qoimai, memlekettık organdar men lauazymdy tūlǧalardyŋ zaŋsyz şeşım qabyldau täuekelın azaityp, aldyn alu äserın qalyptastyrady.
Ol sot memlekettık organnyŋ nemese lauazymdy tūlǧanyŋ şeşımın zaŋsyz dep tanyǧan jaǧdaida, azamattarǧa keltırılgen ziiandy öteu mümkındıgıne konstitusiialyq kepıldık berıluı qajet ekenın atap öttı.
«Jaŋa Konstitusiia ärbır adamnyŋ qūqyqtar men mındetterdıŋ iesı ekenın jäne olardy memleketten qorǧaudy öz betınşe talap etuge qūqyly ekenın aiqyndauy tiıs», – dedı ol.
Qorytyndylai kele, Qarlyǧaş Jamanqūlova būl normany engızu är azamatty jariia-qūqyqtyq qatynastardyŋ teŋ qūqyly qatysuşysyna ainaldyryp, «Zaŋ jäne tärtıp» qaǧidatyn ıske asyrudyŋ naqty qūraly bolatynyn aitty.
