بۇگىن كونستيتۋتسيالىق رەفورمالار جونىندەگى كوميسسيانىڭ وتىرىسىندا قۇرىلتاي جۇمىسىنا قاتىستى نەگىزگى ماسەلەلەر قارالدى. بۇل تۋرالى كونستيتۋتسيالىق كوميسسيا توراعاسىنىڭ ورىنباسارى، مەملەكەتتىك كەڭەسشى ەرلان قارين حابارلادى.
جۇمىس توبى قۇرىلتايدا زاڭ شىعارۋ ۇدەرىسىن قالاي ۇيىمداستىرۋ كەرەكتىگىن تالقىلادى. ۇسىنىلعان فورماتقا سايكەس، زاڭ جوبالارى ءۇش وقىلىمدا قارالادى: العاشقى ەكى وقىلىمدا مازمۇنى ايقىندالادى، ال ءۇشىنشى وقىلىم زاڭ جوباسىنىڭ زاڭنامالىق دۇرىستىعىن قامتاماسىز ەتەدى. سونىمەن قاتار، پارلامەنت بولماعان كەزدە زاڭ شىعارۋ فۋنكتسياسى پرەزيدەنتكە جۇكتەلەتىن بولادى.
پارلامەنتتەگى كۆوتالار ماسەلەسى دە قارالدى. پرەزيدەنتتىك كۆوتا بولمايدى، دەپۋتاتتار ورتاق تارتىپپەن سايلانۋى ءتيىس. ايەلدەرگە، جاستارعا جانە مۇمكىندىگى شەكتەۋلى ازاماتتارعا ارنالعان پارتيالىق كۆوتا ساقتالادى.
پرەزيدەنت ينستيتۋتىنىڭ قىزمەتى مەن داۋىس كۆورۋمىنا قاتىستى قازىرگى كونستيتۋتسياداعى راسىمدەر قۇرىلتاي مودەلىندە ساقتالادى، بۇل تەپە-تەڭدىك جانە تەجەمەلىك مەحانيزمدەرىن قامتاماسىز ەتەدى.
سونداي-اق، نەگىزگى مەملەكەتتىك ورگانداردىڭ قۇرامىن قالىپتاستىرۋ ماسەلەسى قارالدى. قۇرىلتاي بارلىق كونستيتۋتسيالىق ورگانداردىڭ مۇشەلەرىن ءوز كەلىسىمىمەن تاعايىنداۋعا قۇزىرەتتى بولادى. جوعارى سوت سۋديالارىن سايلاۋ قۇزىرەتى جوعارى وكىلدى ورگان دەپۋتاتتارىنا بەرىلەدى.
وسىلايشا، قۇرىلتاي بيلىك تارماقتارى اراسىنداعى تەپە-تەڭدىكتى نىعايتىپ، «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» تۇجىرىمداماسىن جۇزەگە اسىرۋعا مۇمكىندىك بەرەدى.
