الماتى قالاسىنىڭ جەتەكشى جوعارى وقۋ ورىندارى مەن عىلىمي ورتا وكىلدەرى قالا تۇرعىندارىنا ۇندەۋ جاساپ، الداعى رەسپۋبليكالىق رەفەرەندۋمعا قاتىسۋعا شاقىردى.
باستامانى عالىمدار، اكادەميكتەر، جاس عالىمدار، وقىتۋشىلار، پروفەسسور-وقىتۋشىلار قۇرامى، جوعارى وقۋ ورىندارىنىڭ قىزمەتكەرلەرى، سونداي-اق ستۋدەنتتەر قاۋىمى قولدادى.
اكادەميالىق ورتا وكىلدەرىنىڭ ايتۋىنشا، رەفەرەندۋمعا قاتىسۋ – ازاماتتاردىڭ ازاماتتىق جاۋاپكەرشىلىگىنىڭ جانە ەلدىڭ قوعامدىق-ساياسي ومىرىنە بەلسەندى ارالاسۋىنىڭ ماڭىزدى كورىنىسى. قازاقستان رەسپۋبليكاسى ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ الداعى داۋىس بەرۋدىڭ ماڭىزدىلىعىن ەرەكشە اتاپ ءوتتى.
«جاڭا كونستيتۋتسيا – ستراتەگيالىق دامۋدىڭ جولى. قازىر بۇلشىقەتتىڭ ەمەس، اقىل-ويدىڭ باسەكەسى جۇرەتىن ۋاقىت. مەن ەلىمىزدىڭ بولاشاعى ءۇشىن داۋىس بەرەمىن» دەيدى ول.
قازاقستان رەسپۋبليكاسى ۇلتتىق عىلىم اكادەمياسىنىڭ ۆيتسە-پرەزيدەنتى اسقار جۇمادىلداەۆ تا ازاماتتاردى بىرلىككە شاقىرىپ، رەفەرەندۋمنىڭ ماڭىزىن اتاپ ءوتتى. ول: «ەل ومىرىندە ۇلكەن وقيعا – رەفەرەندۋم وتپەك. بارشاڭىزدى بىرىگىپ، وعان قاتىسۋعا شاقىرامىن» دەيدى.
جوعارى وقۋ ورىندارىندا مۇنداي ماڭىزدى وقيعالار ءار ازاماتقا مەملەكەت دامۋىنا قاتىستى ءوز ۇستانىمىن بىلدىرۋگە مۇمكىندىك بەرەتىنى ايتىلۋدا. وقىتۋشىلاردىڭ ايتۋىنشا، ۋنيۆەرسيتەتتەر ءداستۇرلى تۇردە جاستاردىڭ بەلسەندى ازاماتتىق ۇستانىمىن قالىپتاستىراتىن الاڭ بولىپ تابىلادى، ال ستۋدەنتتەردىڭ قوعامدىق ماڭىزى بار ۇدەرىستەرگە قاتىسۋى ديالوگ مادەنيەتىن جانە ەل بولاشاعىنا جاۋاپكەرشىلىك سەزىمىن دامىتۋعا ىقپال ەتەدى. وسى ورايدا
ءال-فارابي اتىنداعى قازاق ۇلتتىق ۋنيۆەرسيتەتى رەكتورى:
جانسەيىت تۇيمەباەۆ “بۇل كونستيتۋتسيالىق نورمالار جاڭا سەرپىن بەرىپ، قوعامدىق كەلىسىمنىڭ جارقىن كورىنىسىنە اينالادى»، – دەپ اتاپ ءوتتى.
قازىرگى ۋاقىتتا الماتىنىڭ بارلىق جوعارى وقۋ ورىندارىندا الداعى رەفەرەندۋمعا ارنالعان كەزدەسۋلەر، تالقىلاۋلار جانە ءتۇسىندىرۋ جۇمىستارى وتكىزىلىپ جاتىر. ۋنيۆەرسيتەت قاۋىمداستىعى قالا تۇرعىندارىن بەيجاي قالماي، داۋىس بەرۋ كۇنى سايلاۋ ۋچاسكەلەرىنە كەلۋگە شاقىرادى.
ولاردىڭ پىكىرىنشە، رەفەرەندۋمعا قاتىسۋ – ءاربىر ازاماتتىڭ ماڭىزدى شەشىمدەر قابىلداۋعا ءوز ۇلەسىن قوسىپ، ءوزىنىڭ ازاماتتىق ۇستانىمىن ءبىلدىرۋ مۇمكىندىگى.
