ماڭعىستاۋ وبلىسىنىڭ اكىمى نۇرداۋلەت قيلىبايدىڭ ۆيدەوسى الەۋمەتتىك جەلىدە تارادى. وندا ول كونستيتۋتسياداعى قازاق ءتىلىنىڭ مارتەبەسىنە قاتىستى پىكىر ءبىلدىردى.
«قازاق ءتىلى – ءبىزدىڭ انا ءتىلىمىز. كونستيتۋتسيانىڭ 7-بابى، 1-تارماعىندا مەملەكەتتىك ءتىل – قازاق ءتىلى دەپ ناقتى جازىلعان. جينالىستاردا جانە مەملەكەتتىك ۇيىمداردا ورىس ءتىلىن رەسمي تۇردە قازاق تىلىمەن بىرگە پايدالانۋعا بولادى. كونستيتۋتسيانى ءبىر ادام جازعان جوق — بۇكىل كوميسسيا اشىق، ونلاين فورماتتا جۇمىس ىستەدى. كىم قانداي پىكىر ايتقىسى كەلسە، ورتاعا سالىپ وتىردى. ونىڭ قۇرامىندا عالىمدار، ساراپشىلار مەن ماماندار بولدى. ءومىر كورگەن اقساقالدارىمىز، زيالى قاۋىم وكىلدەرى دە قاتىستى.
حالىق اراسىندا “قاشان الەمدەگى دامىعان ەلدەر سياقتى بولامىز؟” دەگەن اڭگىمە ءجيى ايتىلادى. مىسالى، الەمدەگى ەڭ باقىتتى ەلدەردىڭ ءبىرى — فينليانديادا ەكى مەملەكەتتىك ءتىل بار: فين جانە شۆەد تىلدەرى. ال سينگاپۋردا ءتورت ءتىل مەملەكەتتىك دەڭگەيدە قولدانىلادى. بانك سالاسىنىڭ ورتالىعى سانالاتىن شۆەيتساريادا دا ءتورت ءتىل بار. بەلگيادا ءۇش رەسمي ءتىل قولدانىلادى. سوندىقتان بىزدە قازاق ءتىلىنىڭ قادىرىن ەشكىم ءتۇسىرىپ وتىرعان جوق — كونستيتۋتسيادا مەملەكەتتىك ءتىل رەتىندە قازاق ءتىلى انىق كورسەتىلگەن»، – دەدى اكىم.
